Улсын Ерөнхий пдрокуророос цаг үеийн асуудлаар мэдээлэл хийлээ. Энэ үеэр Улсын ерөнхий прокурорын туслах прокурор, Ял эдлүүлэх ажиллагаанд хяналт тавих хэлтсийн дарга Д.Энхтөр "Шүүхээс оногдуулсан хорих, хорихоос өөр төрлийн ял эдлүүлэх ажиллагаа, тэнсэх, албадлагын арга хэмжээг биелүүлэх, баривчлах, цагдан хорих шийдвэрийг биелүүлэх ажиллагаа хуулиар тогтоосон нөхцөл, журамд нийцэж байгаа эсэхэд прокурор хяналт тавин ажиллаж байна. Энэ оны нэгдүгээр улирлын байдлаар Прокурор ял эдлүүлэх ажиллагаанд хяналт тавих ажлын чиглэлээр нийт 197 шалгалт хийж, 1661 удаа танилцах ажиллагаа хийсэн байна.

 Шалгах танилцах ажиллагааны явцад ял эдлүүлэх ажиллагаанд мөрдөгдөж буй хууль, журмыг зөрчсөн, хангалтгүй хэрэгжүүлсэн 500 гаруй зөрчлийг илрүүлж, зөрчлийг засуулах, давтан гаргахгүй байх чиглэлээр прокурорын шаардлага 34-г бичиж, зөрчлийг арилгуулах арга хэмжээ авсан байна.

Хорих анги, цагдан хорих, баривчлах, саатуулах байранд хүний эрх зөрчигдөх, эрүүдэн шүүхээс урьдчилан сэргийлэх зорилгоор прокурор ял эдлүүлэх, баривчлах байрны үйл ажиллагааг шалгах, танилцах ажиллагааг тогтмол хийж байна. 

 Шүүхээс хорих ял шийтгүүлсэн, хорихоос өөр төрлийн ял шийтгүүлсэн, тэнсэх, албадлагын арга хэмжээ авагдсан 9600  гаруй ялтан, зөрчлийн шийтгэл, албадлагын арга хэмжээ авагдсан 650 гаруй иргэн, хуулийн этгээд, баривчлах шийтгэлтэй 600 гаруй хүний ял, шийтгэлийг эдлүүлэх ажиллагаанд хяналт тавин ажиллаж байна.

Хорих ялаас хугацаанаас нь өмнө суллаж хяналт тогтоолгох, өвчний учир ялаас чөлөөлүүлэх, дэглэм өөрчлүүлэхээр хорих ангиас ирүүлсэн саналыг прокурор хянаж 429 дүгнэлт бичсэн нь өмнөх оны мөн үеэс 30 хувиар өссөн. 

Нийт 1.7 тэрбум төгрөгийн торгох ялтай 1910 ялтны торгох ял бүрэн биелсэн,  ялын биелэлт 99 хувьтай байгаа нь өмнөх оны мөн үеэс 3 хувиар өссөн байна.

Нийтэд тустай ажил хийлгэх ял шийтгүүлсэн  609 ялтан хяналтад байгаа ба өмнөх оны мөн үетэй харьцуулахад хяналтад авагдсан ялтны тоо 3 хувиар буурсан байна.

Зөрчлийн торгох шийтгэлээр шийтгүүлсэн 594 хүн, хуулийн этгээдийн 265.9 сая  төгрөгийн шийтгэл биелсэн нь 30 хувьтай, одоо хяналтад 2.6 тэрбум  төгрөгийн шийтгэлтэй 594 хүн, хуулийн этгээд байна.

Хорихоос өөр төрлийн ял шийтгүүлсэн ялтан хуульд заасан үүргээ биелүүлээгүй, зөрчил гаргасан, торгох ялыг шүүхээс тогтоосон хугацаанд биелүүлээгүй, ял эдлэхээс зайлсхийсэн  тохиолдолд олж илрүүлэх талаар тодорхой арга хэмжээнүүдийг авч ажилласнаар энэ оны эхний улирлын байдлаар торгох ял шийтгүүлсэн 34, нийтэд тустай ажил хийлгэх ял шийтгүүлсэн 112 ялтны ялыг хорих ялаар солиулсан нь өмнөх оны мөн үетэй харьцуулахад  64 хувиар өссөн байна.

Мансууруулах эм, сэтгэцэд нөлөөт бодисыг хууль бусаар ашигласан гэмт хэрэгт шүүхээс хорих ял оногдуулахгүйгээр тэнссэн, хорих ялаас хугацааны өмнө суллаж, хяналт тогтоосон этгээдүүд хяналтад байх хугацаандаа мансууруулах эм, сэтгэцэд нөлөөт бодис хэрэглэсэн эсэхийг Эрүүгийн цагдаагийн газрын Хар тамхитай тэмцэх газартай хамтран тодорхой хугацаанд тогтмол шалгах арга хэмжээ авч ажиллаж байна.

Өнгөрсөн онд мансууруулах эм, сэтгэцэд нөлөөт бодистой холбоотой гэмт хэрэгт шүүхээс хорих ял оногдуулахгүй тэнссэн, хорих ялаас хугацааны өмнө суллаж хяналт тогтоосон этгээдүүд шүүхээс хүлээлгэсэн үүргийг хэрхэн биелүүлж байгааг гэнэтийн байдлаар шалгахад шалгалтад хамрагдсан 178 хүнээс  28 нь мансууруулах, сэтгэцэд нөлөөт бодис хэрэглэсэн байсан тул 25 хүний тэнссэн шийдвэрийг хүчингүй болгуулж хорих ял оногдуулан, 3 хүнд зөрчлийн тухай хуульд зааснаар баривчлах шийтгэл оногдуулсан байна. Мөн мансууруулах эм, сэтгэцэд нөлөөт бодис биедээ авч явсан 4 хүнд эрүүгийн хэрэг үүсгэн шалгуулахаар цагдаагийн байгууллагад шилжүүлсэн байна.

   Цагдан хорих байр, хорих ангид хоригдсон этгээдийг эрүүдэн шүүх явдлыг гаргуулахгүй байх, урьдчилан сэргийлэх үүднээс прокурорын байгууллагаас цөөнгүй арга хэмжээнүүдийг авч байна.

 Тухайлбал Улсын Ерөнхий прокуророос 2019 онд “Эрүү шүүлт тулгахаас урьдчилан сэргийлэх тухай” албан даалгавар гаргаж, хэрэгжилтэд хяналт тавин ажиллаж байна.

Хорих, цагдан хорих, баривчлах, саатуулах байранд хоригдож байгаа этгээд  тухайн анги, байрны үйл ажиллагаа, албан хаагчийн харилцаатай холбоотой гомдлыг тухайн анги, байрны захиргаагаар дамжуулан холбогдох байгууллага, албан тушаалтанд хүргүүлдэг байсныг болиулж, Улсын ерөнхий прокурорын тушаалаар “Хорих, цагдан хорих, баривчлах төв байранд хоригдож байгаа этгээдээс тухайн анги, байрны үйл ажиллагаа, албан хаагчийн харилцаатай холбоотой гомдол, хүсэлтийг шууд хүлээн авах хайрцаг ажиллуулах журам”-ыг баталж, хяналт тавьж байгаа прокурор 14 хоног тутам хайрцагийг биечлэн шалгаж, гомдол, хүсэлтийг прокурорын бүртгэлд оруулан шийдвэрлэж байна.

Өнгөрсөн онд тусгай хайрцагаар улсын хэмжээнд нийт 139 гомдол, хүсэлт, мэдээлэл хүлээн авч шийдвэрлэснээс  эрүүдэн шүүсэн талаарх 2 гомдол, байрны үйл ажиллагаатай холбоотой 23, албан хаагчийн ёс зүйтэй холбоотой 43 гомдол, бусад асуудлаар буюу байрны ахуй нөхцөл, хоол хүнс, холбогдсон хэрэг, зөрчил, хорих ангийн дэглэм бууруулах, хугацаанаас өмнө суллагдах, прокурортой биечлэн уулзах зэрэг асуудлаар 71 гомдол, хүсэлт гаргасан бөгөөд холбогдох хууль журмын дагуу шийдвэрлэсэн байна" гэлээ.