УИХ-ын Төрийн байгуулалтын байнгын хорооны өнөөдрийн хуралдаанаар УИХ-ын чуулганы хуралдааны дэгийн тухай хуульд нэмэлт өөрчлөлт оруулах талаар хэлэлцлээ. Энэ үеэр гишүүд асуулт асууж, хариулт авсан юм. 

Тухайлбал, УИХ-ын гишүүн Ж.Батзандан "Чуулганыг цахимаар хуралдуулах саналыг дэмжиж байна. Гэхдээ дэгийн тухай хуулийг нарийн хийхгүй бол хэд хэдэн сөрөг тал ажиглагдаж байна. Өөрөөр хэлбэл, дайны байдал, онц байдал зарласан зэрэг үед цахим хуралдах заалтыг оруулж ирж байна. Олон улсын хөл хорио гэдгийг ямар өвчний үед, яаж тодруулах юм бэ. Тэгэхгүй халдварт өвчин гарсан гэдгээр далимдуулж төрийн эргэлтийн шинжтэй, төрийн эрхийг хууль бусаар булааж авах оролдлого гарах вий гэдгээс би болгоомжилж байна.

Мөн Монгол Улс долдугаар сарын 1-нд онц байдал зарлаж байсан түүх бий.

Таван иргэнээ Сүхбаатарын талбай дээр буудаж алчхаад онц байдал зарлаж байлаа. Хэрвээ тэр үед Төрийн ордныг босогчид эзэлсэн бол энэ хууль яаж үйлчлэх байсан юм бэ. УИХ-ын гишүүд нь уул руу зугтааж, ууланд IPAD бариад хуралдах байсан юм уу. Эсвэл тойрог руугаа зугтааж, тэндээсээ хуралдах байсан юм уу. Үнэхээр дэгийн тухай хуульд нэмэлт өөрчлөлт оруулах юм бол онц байлал, дайны байдал гэдгээ авч хаясан нь дээр байх. Зөвхөн өнөөдрийн өвчин зовлонтой хэсгийг үлдээх хэрэгтэй. Гамшгийн нөхцөл байдлыг дайны нөхцөл байдалтай холбож болох уу гэдэг санал хэлмээр байна. Та бүхэн олонх юм чинь шийдэх биз" гэлээ.