БНСУ-д эмчлүүлэхээр очоод Монголдоо ирж чадахгүй гацсан 82 настай Д.Баттөр гуайн талаар бид мэдээлсэн билээ. Тэгвэл тэрбээр өнөөдөр Монголдоо ирлээ. Д.Баттөр гуайн хувьд саажилттай, тэргэнцэртэй учир асран хамгаалагч зайлшгүй шаардлагатай. Энэ утгаараа түүний гэргий хамт ирсэн байна. Өнөөдөр орой 20.30 цагт Буянт-Ухаа нисэх буудалд газардсан Сөүл-Улаанбаатар чиглэлийн онгоцоор нийт 267 иргэн ирж байгаагаас
• өндөр настан болон асран хамгаалагчтай: 50
• эрүүл мэндийн шалтгаантай болон асран хамгаалагчтай: 43
• жирэмсэн болон асран хамгаалагчтай: 5
• оюутан: 18
• бага насны хүүхэдтэй болон гэр бүл: 49
• БНСУ-д хууль бусаар оршин суусан хэргээр түр саатуулах байранд саатуулагдсан: 55
• Хүндэтгэн үзэх бусад шалтгаантай: 47 хүн байна.
Иргэдийг 21 хоног тусгаарлаж, шинжилгээнд хамруулна гэдгийг Улсын онцгой комиссын Шуурхай штабаас мэдээлсэн. Дээрх иргэдийг найман автобусаар тээвэрлэж тусгаарлах байранд хүргэсэн бол ачаа тээшийг нь ариутгаж халдваргүйжүүлэхээр авч явсан байна.
Эдгээр иргэд Солонгост коронавирусний шинжилгээнд хамрагдаж, улмаар Инчон нисэх буудалд ариутгал, халдваргүйжүүлэлт хийлгэсэн аж.
