Сонгинохайрхан дүүргийн нутаг дэвсгэрт нэр бүхий иргэд "Ардчилал таймс" сонин болон амны хаалт, ариутгал, халдваргүйжилтийн бодис тарааж буй мэдээлэл цацагдсан билээ. Уг асуудлыг тус дүүргийн иргэд эсэргүүцэж өнөөдөр мэдээлэл хийлээ. Тодруулбал, "Вирусний цар тахлын үед гараас гарт юм дамжуулах, олон хүн цугларсан газар очихгүй байх зэргийг хориглож байна. Гэтэл нэр бүхий иргэд Ардчилал таймс сонины хамт эд материал айлуудаар тарааж байна.

Энэ сонинд АН-ын дарга С.Эрдэнэ УИХ-ын 2020 оны сонгуульд АН ялалт байгуулах боломжтой гэж үзэж байна гэсэн утгатай мэдээлэл нийтлэгдсэн байна.

Эндээс үзвэл, энэ бол сонгуулийн пиар гэдэг нь харагдаж байна. Сонгуульд өрсөлдөхөөр АН-д 100 сая төгрөг тушаасан гэх хүмүүсийн байр суурь ч байна.

Бид аль нэг намыг харлуулахыг хүсэхгүй. Гэхдээ энэ мэт үйлдэл давтагдвал аль нам байсан ч хамаагүй бид эсэргүүцлээ илэрхийлнэ. Дээрх эд материалыг тарааж явсан хүн өөрийгөө иргэн хүний хувиар гэж мэдээлсэн. Тэгвэл тэр хүн бол АН-ын үүрийн дарга. Энэ утгаараа сонгуулийн пиар гэж харж байна. Айлуудад тараасан амны хаалт, сонин зэрэгт багадаа 1000 төгрөг зарцуулна. Дүүргийн өрхүүдэд үржүүлбэл, 52 сая төгрөг болно. Энэ мөнгийг хэн гаргаж байна вэ. 

Гэр хорооллын айл өрхийн нүхэн жорлонг ариутгал хийхэд холбогдох албаныхан сайн ажиллаж байна. Тогтмол ариутгал хийж байна. 

Үүнээс гадна Улаан загалмай нэрийн дор ТЭСО компанийн лапша брэнд, зөв аарцны ундаа тарааж байна. 

Ингэхээ болиоч ээ. Ард түмэн энэ зэргийн юманд хууртахаа больсон цаг шүү гэдгийг сануулъя. Намаа сурталчилмаар байвал хуулиа дага. Тэгвэл хэн ч эсэргүүцэхгүй. Хорио цээрийн үед гараас гарт юм дамжуулахаа болиоч ээ. Түүнчлэн бага насны хүүхдэд сурталчилгааны сониноо бариулаад амны хаалт, сонин зэргийг айлуудаар тарааж байна. Итгэхгүй бол бичлэгийг үз. Дахиж битгий ийм үйлдэл гаргаарай. Сонгуульд өрсөлдөж болно. Гол нь хуулиа дага" гэдгийг тус дүүргийн IV хорооны иргэн Дашцэнгэл тэргүүтэй иргэд мэдээллээ. 

Г.Маргад