УИХ-ын хаврын ээлжит чуулган хуралдаж байна. Чуулганаар “Алсын хараа 2050” бодлогын баримт бичгийн талаар хэлэлцэж байна.  Энэ үеэр гишүүд асуулт асууж, хариулт авлаа.

Т.Аюурсайхан: Хөгжлийн бодлогын залгамж халааг олон гишүүн ярьж байна. Бодлогоо хэрхэн залгамж чанартай байлгах вэ. Дөрвөн жилийн өмнө Монгол Улсын тогтвортой хөгжлийн үзэл баримтлал 2030 гэж баталсан. Ингэхдээ өмнөх хөгжлийн үзэл баримтлалаа хүчингүй болгосон. Өнөөдөр 2050 хөгжлийн хөтөлбөрөө батлахдаа дөрвөн жилийн өмнөх бодлогоо хүчингүй болгохоор оруулж ирсэн байна. Үүнийхээ үнэлгээг нь хийгээгүй байж хүчингүй болгочихоор хэр залгамж халаатай байх юм. Хөгжлийн үзэл баримтлаад яагаад дөрвөн жил болоод өөрчлөөд байгаа юм бэ. Хөгжлийн ямар загварт тулгуурласан бэ гэхэд хариулж мэдэхгүй байна шүү дээ.

Л.Оюун-Эрдэнэ: Ардчилсан хувьсгал монголд ялаад 30 жил болж байна. Олон түвшинд мэдрэгдэж байгааг судлаачид ярьж байна. Бид аливаа асуудлыг бүхэлд нь харахаас өөр аргагүй. Тиймээс өнгөрсөн хугацаанд батлагдсан байсан 567 бодлогын баримт бичигт дүн шинжилгээ хийж үзсэн. Маш олон давхцал байгаа учраас үүнийгээ сайжруулаад явах нь зүйтэй. Өөр нэг зүйл НҮБ 2020-2050 хөгжлийн загвар руу явж байна. Ямар нэгэн тоо суурь үзүүлэлт зөрсөн зүйл байхгүй. Хөгжлийн бодлогын баримт бичиг Монгол Улсын өнгөрсөн түүх одоогийн нөхцөл байдал ирээдүйн төсөөлөл дээр гаргасан загвар юм.

Б.Лхам