Улсын онцгой комиссын Шуурхай штабаас олон нийтэд хандсан мэдээлэл хийлээ. Энэ удаагийн хуралд Гадаад харилцааны сайд Д.Цогтбаатар "УОК МИАТ-тай хамтарч 10-аад чартер нислэг хийсэн. Энэ бүх нислэгтэй холбоотой зарим иргэдийн дунд хардлага үүсээд байна. Тиймээс нээлттэй мэдээлэл хийе. УОК-оос таван шалгуур тавьсан. Үүнийг иргэд мэднэ. Сөүлд ийм иргэд маш олон байдаг. Хамгийн эхний нислэгийг онлайнаар биш иргэдийг ирүүлж бүртгэсэн. Солонгосын талаас иргэдийг нэг дор бөөгнөрүүлэхгүй байхыг сануулсан. Тиймээс онлайнаар бүртгэж эхэлсэн. Эхний ээлжинд 500 гаруй иргэн бүртгүүлж, баталгаажсан байсан. Үүний эхний хэсэг нь ирсэн. Үлдсэн хэсэг нь дараа нь ирсэн. Энэ сарын 8-нд ирсэн онгоцоор транзит 50 гаруй зорчигч ирсэн. Бусад нь Солонгосоос ирсэн. Өдөр 14.00 цаг гэхэд онгоц дүүрсэн учир бүртгэлээ зогсоосон. Гэтэл өөрсдийн хүмүүсээ авлаа гэж хардсан. 

Германы онгоц арай өөр байсан. Учир нь Европид тийм ч олон хүн эмчилгээнд ордоггүй юм байна. Солонгостой харьцуулахад бага хүн байдаг учир 10 гаруй суудал сул ирсэн. Монгол Улсын гурав дахь Ерөнхийлөгч Н.Энхбаяр Москвагаас сууж ирсэн.

Токиогийн хувьд мөн ялгаагүй. Шалгуур үзүүлэлтэд орох хүн цөөн гэсэн үг. 

Нийтдээ 1800-гаад иргэнээ татаж авсан байна. Нүүрсний тээвэрлэлт, хойд, урд хилийн боомтоо тооцвол 6000 иргэн байна. Энэ бүхнийг хийхэд маш хүндрэлтэй ачаалалтай байсан".

Дээр нь манайх хоёрхон онгоцтой, цөөн экибажтай. Нислэгт яваад ирээд тусгаарлагддаг. Үүнээс гадна улс орнууд хилээ хааж байна. Япон улс энэ сарын 30-ныг хүртэл хилээ хаасан. Ялангуяа транзит нислэгийг зогсоосон. ОХУ, БНХАУ хилийн хоригоо чангаруулсан учир нэмэлт зөвшөөрөл авах шаардлага тулгарч байна. Нөгөөтээгүүр, энд тусгаарлалтын байр, эмч ажилчдын ажиллах боломж зэргийг харж байж дараагийн чартер нислэгийн хуваар гарна" гэлээ.