Баянзүрх дүүргийн 11 дүгээр хорооны нутаг дэвсгэр, хуучин товчооны зүүн талын зам дээр Hino маркийн том оврын ачааны машин, том оврын машины чиргүүлтэй мөргөлдсөн ноцтой осол гарсан билээ. Ослын улмаас хоёр хүнийг яаралтай түргэн тусламжийн машинаар ГССҮТ рүү авч явсан бол осол гаргасан том оврын машины жолооч согтууруулах ундаа хэрэглэсэн байх магадлалтай байгаа аж. Энэ үеэр Баянзүрх дүүргийн Тээврийн цагдаагийн албаны урьдчилан сэргийлэх хэлтсийн дарга, цагдаагийн хошууч Э.Энхболд "Цагдаагийн алба хаагчид торгох гэж байна, торгох гэж улайрлаа гэдэг зүйлийг иргэд ярьдаг. Гэтэл угтаа бол тээврийн бүрэн бүэн байдлыг хангах, иргэдийн эрүүл мэндийг хамгаалах үүднээс байнга хяналт шалгалт хийдэг. Үүнийг иргэд ухамсарлаж ойлгомоор байна.

Сүүлийн үед цагдаагийн алба хаагчдын биед халддаг, хэл амаар доромжлох явдал ихээр гарах боллоо. Иргэд үнэхээр даварч байна. Сүүлийн долоо хоногт ийм үйлдэл хэд хэдэн удаа давтагдсан.

Энэ сарын 1-нд урсгал сөрж, цагдаагийн алба хаагчийн биед халдсан эмэгтэй жолоочийн замын хөдөлгөөний дүрэм зөрчсөн үйлдэлд жолооны эрхийг гурван сараар хасаж, 50 мянган төгрөгөөр торгосон. Харин цагдаагийн алба хаагчийн биед халдсан үйлдэлд Зөрчлийн тухай хуулиар хэрэг нээж шалгаж байна. Цагдаагийн алба хаагчийн биед халдвал хуулийн дагуу хариуцлага хүлээлгэх хуулийн зохицуулалттай. Иргэдэд хандаж хэлэхэд иргэд цагдаагийн байгууллагатай хамтарч ажилладаг, дүрэм зөрчсөн нэгний үйлдлийг өөгшүүлдэггүй баймаар байна. Иргэдийг хямрааж, стресстүүлэхгүйн тулд ноцтой ослын талаарх бичлэг, баримтыг тэр бүр олон нийтэд дэлгэдэггүй. Гэтэл иргэд үүргээ ухамсарлаж, замын хөдөлгөөнд хариуцлагатай оролцохгүй байгаа учир арга буюу энэ удаа лайв хийж, олон нийтэд сэрэмжлүүлж байна" гэлээ. 

Г.Маргад