Ерөнхий сайд асан М.Энхсайханд холбогдох шүүх хурал Чингэлтэй дүүргийн шүүхэд хоёр дахь өдрөө үргэлжилж байна. Түүнийг “Сошиал сүлжээнд хэтэрхий идэвхтэй байгаа нь шүүх ажиллагаанд нөлөөлөх магадлалтай” гэсэн үндэслэлээр цагдан хорих шийдвэрийг шүүхээс гаргаад байсан.  

Ерөнхий сайд асан М.Энхсайханы хувьд “Эрдэнэс Тавантолгой”-н гэрээний байгуулахдаа эрх мэдэл албан тушаалаа урвуулсан буюу ашиг сонирхлын зөрчилтэй этгээдээс авто машин худалдаж авсан хорлон сүйтгэх ажилагаа зохион байгуулсан гэх үндэслэлээр буруутгаж буй. Гэвч тэрбээр уг гэрээ батлагдаж, хэрэгжээгүй. Мөн гэрээний төслийг би ганцаараа бэлтгээгүй, кабинетын зарчмын дагуу тухайн үеийн Засгийн газар бэлтгэж танилцуулсан гэсэн тайлбарыг илэрхийлж байсан юм.

Ташрамд дурдахад, Ерөнхий сайд асан М.Энхсайханд холбогдох шүүх хуралтай зэрэгцэн Ерөнхий сайд асан С.Баяр, Сангийн сайд асан С.Баярцогт, “Эрдэнэс Оюутолгой”-н гүйцэтгэх захирал асан Да.Ганболд “Эрдэнэс Монгол”-н захирал асан С.Бямбасайхан нарт холбогдох шүүх хурал энэ сарын 5-нд Чингэлтэй дүргийн Эрүүгийн хэргийн анхан шатны шүүхэд болсон. Гэвч талуудын хүсэлтээр шүүх хурал ирэх даваа гариг буюу тавдугаар сарын 11-нд болохоор хойшлогдсон юм.

Ерөнхий сайд асан С.Баяр нарын долоон хүнийг албан тушаалын байдлаа урвуулан ашигласан, үндэслэлгүйгээр хөрөнгөжсөн, мөнгө угаасан буюу Оюутолгой гэрээг байгуулахдаа “Айвенхоу майнз” компанид илт давуу байдал үүсгэсэн гэсэн хэргээр 2017 оноос шалгаж эхэлсэн билээ.