БНСУ-ын агаарын тээврийн компани болох "Корэйн Эйр" авиа компани ирэх зургадугаар сарын 1-нээс эхлэн Монгол руу нислэг үйлдэх тухай мэдээлэл цацагдсан билээ. Уг асуудлаар Зам, тээврийн хөгжлийн сайд Б.Энх-Амгалангаас утсаар тодруулахад "Монгол руу нислэг үйлдэх хүсэлтээ албан ёсоор ирүүлээгүй. Хэрвээ албан ёсоор санал ирүүлбэл Улсын онцгой комиссын хуралдаанаар шийднэ" гэдэг хариултыг өглөө.

Тиймээс тус яамны Агаарын тээврийн бодлогын хэрэгжилтийг зохицуулах газрын дарга Ч.Мөнхтуяагаас дараах зүйлийг тодрууллаа.

-"Корэйн Эйр" авиа компани Монгол руу нислэг үйлдэх болсон тухай мэдээлэл Солонгосын зарим сайтуудад гарсан байна лээ. Сайдын зүгээс "Ийм хүсэлт албан ёсор ирээгүй" гэдэг тайлбар өгсөн. Гэхдээ Солонгосын талаас ЗХТЯ-тай энэ талаар санал солилцсон юм болов уу?

-Өнөөдөр өглөө ийм мэдээлэл гарсныг Солонгосын сайтаас уншсан. "Корэйн Эйр" авиа компанийн хувьд жирийн үед долоо хоногт 110 чиглэлд 900 удаагийн нислэг үйлддэг юм байна. Цар тахал гарсантай холбогдуулан  13 чиглэлд 55 нислэг үйлдэж байгаа гэсэн. Харин ирэх зургадугаар сарын 1-ээс эхлэн 32 чиглэлд 110 удаагийн нислэг хийхээр төлөвлөж байгаа юм билээ. Хэрвээ Солонгосын талаас Монгол руу нислэг үйлдэе гэдэг саналаа албан ёсоор тавьбал Улсын онцгой комиссын хуралдаанаар шийднэ. Манай улсын хувьд энэ сарын 31-нийг хүртэл агаарын замаа хаасан. Энэ утгаараа эцсийн шийдвэрийг УОК-оос гаргана. 

Гэхдээ энэ сарын 7-нд буюу өчигдөр "Монгол Улсад байгаа гадаад иргэдийг очиж авах гэсэн юм. Аль байгууллагад хандах бэ?" гэж "Корэйн Эйр" авиа компаниас манай яаманд хандсан. Бид "УОК-т хандах ёстой" гэдэг хариулт өгсөн. Одоогийн нөхцөлд УОК-оос гаргасан шийдвэрийн дагуу Гадаад харилцааны яамнаас чартер нислэгийг зохион байгуулж МИАТ компани нислэг үйлдэж байгаа. Үүнийг та бүхэн мэднэ.

-Тэгэхээр "Корэйн Эйр" авиа компанийн зүгээс Солонгос дахь монголчуудыг авчрах бус харин Монголд байгаа гадаад иргэдийг авах нислэг үйлдэх сонирхолтой байгаа юм байна. Тийм үү?

-Бидэнд хандахдаа тэгж хэлсэн. Яахав, Солонгосын талаас шаардлагатай ачаа, тээвэр авчрах байх. Гол нь энд байгаа байгаа Америк, Канад, Австрали зэрэг улс руу зорчих гадаад иргэдийг авч явах сонирхолтой байгаа. Нөгөөтээгүүр, гадаад дахь монгол иргэдийг авчрах зөвшөөрлийг зөвхөн УОК-оос гаргана. Учир нь өнгөрсөн гуравдугаар сарын 28-нд БНСУ-ын тусгай үүргийн онгоцоор ирсэн Турк улсын иргэдээс коронавирусний халдвар илэрсэн шүү дээ. Энэ бол манай талаас зохион байгуулсан нислэг биш учир хурдавчилсан тестээр шалгаагүй байсан зэрэг хяналт тавих боломжгүй байсан. Харин МИАТ-ийн нислэгээр ирж байгаа зорчигчдыг халууныг нь үзэх, ариутгал халдваргүйтлийн арга хэмжээ авах зэргээр эрсдэлийг бууруулж байгаа. 

-Улсын онцгой комисст хүсэлтээ хүргүүлсэн болов уу?

-Хүргүүлнэ гэж өчигдөр хэлсэн. Хүргүүлсэн байх.

-Энэ сарын 31-нээр хөл хорионы хугацаа дуусна. Тэр үеэс Монгол руу нислэг үйлдэх боломжтой болох нь гэж ойлгож болох уу?

-УОК-оос агаарын замаа нээж, зөвшөөрөл олговол болохгүй гэх зүйлгүй байх. Ер нь дэлхийн зарим улс орнууд улсын хилээ үе шаттай нээхээр болсон. Турк улс гэхэд ирэх сарын 12-ноос хилээ нээнэ гэж олон улсад зарласан. БНХАУ-аас эхлээд олон улс ирэх сараас үе шаттай нээнэ гэсэн. "Корэйн Эйр" компанийн хувьд энэ шийдвэртэй нь уялдуулах сонирхолтой байгаа юм билээ. 

Г.Нацаг-Эрдэнэ