Иргэд хөл хорионы үед ахуйн хүрээнд болон автомашиндаа архи согтуурах улмаар согтуугаар тээврийн хэрэгсэл жолоодох зөрчил нилээдгүй байна гэсэн мэдээллийг Сүхбаатар дүүрэг дэх Замын цагдаагийн хэлтсийн зохицуулагч, цагдаагийн ахлах дэслэгч Б.Далайцэрэн өглөө. Тэрбээр Сүхбаатар дүүргийн хэмжээнд 2020 он гарснаар өнөөдрийг хүртэл 543 иргэн согтуугаар тээврийн хэрэгсэл жолоодон замын хөдөлгөөнд оролцсоны улмаас саатуулагдсан. Үүнээс 64 нь зам тээврийн осол гаргасан болон таван хэргийн улмаас зургаан хүн гэмтсэн гэмт хэрэг тус тус бүртгэгдсэн.
2019 оны эхний дөрвөн сарын байдлаар 654 иргэн согтуугаар тээврийн хэрэгсэл жолоодсныг Цагдаагийн алба хаагчид илрүүлж учирч болох эрсдэлээс сэргийлэн ажилласан бол 2020 онд 543 болж бүртгэгдсэн үзүүлэлттэй байна. Тус хэлтсийн алба хаагчид уг төрлийн зөрчлийг илрүүлэх чиглэлд анхааран ажиллаж байна.
Иргэддээ анхааруулж хэлэхэд Согтуугаар тээврийн хэрэгсэл жолоодсон тохиолдолд Зөрчлийн тухай хуулийн 14.7.3.1 дэх хэсэгт заасны дагуу 400 мянган төгрөгөөр торгож 1 жил тээврийн хэрэгсэл жолоодох эрх хасах шийтгэл оногдуулдаг. Энэ зөрчлийг дахин гаргах буюу эрхээ хасуулсан үедээ согтуугаар тээврийн хэрэгсэл жолоодсон бол Зөрчлийн тухай хуулийн 14.7.5 дахь хэсэгт заасны дагуу 7-30 хоног баривчлах шийтгэл оногдуулдаг" гэлээ.
