Нийслэлийн Прокурорын газраас Ерөнхийлөгч асан Ц.Элбэгдоржийг яллагдагчаар татсан билээ. Түүнийг АТГ-аас Тавантолгойн асуудлаар шалгаж эхэлсэн бөгөөд удаа дараа мэдүүлэг авсан юм. Хамгийн сүүлд гэхэд энэ доло хоногийн эхээр дахин мэдүүлэг өгөөд байсан. Тэгвэл түүнийг Монгол Улсын хилээр гарах хязгаарлах, эрүүгийн хэргийн яллагдагч нар болох нэр бүхий 14 хүнтэй уулзахыг хориглох хязгаарлалт тогтоох таслан сэргийлэх арга хэмжээ авахуулах саналаа Сүхбаатар дүүргийн Эрүүгийн хэргийн анхан шатны шүүхэд хүргүүлжээ. 

Уг саналыг шүүх хянан хэлэлцээд яллагдагч Ц.Элбэгдоржид нэр бүхий 13 яллагдагч нартай уулзахыг хориглох, Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авсан шүүгчийн захирамж гаргасан байна.

Хэдийгээр прокуророос нэр бүхий 14 хүнтэй уулзахыг хориглох хүсэлт гаргасан ч шүүхээс яагаад ч юм бэ, нэг хүнийг нь орхигдуулсан байна. Тэгвэл энэ хүн хэн бэ гэдэг асуулт дахин урган гарч ирлээ.

Хэргийг эргэн сануулахад, Монгол Улсын иргэн Цахиагийн Элбэгдоржийг Эрүүгийн хуулийн ерөнхий ангийн 1.8-1, 2002 оны Эрүүгийн хуулийн ерөнхий ангийн 35.6 дахь хэсэгт заасныг журамлан мөн хуулийн 263 дугаар зүйлийн 263.2 дахь хэсэгт зааснаар нийслэлийн Прокурорын газар (НПГ)-аас 2020 оны нэгдүгээр сарын 30-нд эрүүгийн хэрэг үүсгэн яллагдагчаар татсан байдаг. 

Ташрамд дурдахад, түүнийг өнгөрөгч оноос эхлэн АТГ-аас шалгасан юм. Улмаар ирж мэдүүлэг өгөхийг дуудах үед "Хууль дуудвал гутлаа тослоод, зангиагаа зүүгээд очих ёст"ой" гэж цахим хуудастаа мэдэгдэж, АТГ-т мэдүүлэг өгсөн. Гэвч үүнээс хэдхэн хоногийн дараа гадаадын улсад хурал, чуулганд орохоор улсын хил давснаас хойш таван сар гаруйн дараа Монголдоо эргэн ирсэн юм.

Түүнийг чартер онгоцоор ирэх үед цагдан хорих яриа гарсан. Гэвч АТГ-аас "Хөл хорионы дэглэм сахиж ажиллана.

Тусгаарлалтын хугацаа дуусаагүй учир цагдан хорих ямар ч боломжгүй" гэдгийг мэдэгдэж байсан юм.

Харин "Токио Инн" зочид буудалд 21 хоног тусгаарлагдаж гарсны дараа Цагдан хорих 461 дүгээр ангид цагдан хорино, өрөөг нь бэлдсэн гэх мэдээлэл цацагдсан ч мөн л ташаа мэдээлэл байж таарсан. Үүнтэй зэрэгцээд Ерөнхий сайд асан М.Энхсайханд холбогдох хэргийн шүүх хурал болж түүнд шүүхээс 4.6 жилийн хорих ял оноосон юм.

Ингэхдээ Ц.Элбэгдоржийн дэмжлэгээр гэх тодотголтой хэргийг тусгаарлаж, прокурорт шилжүүлсэн юм. 

Энэ ч утгаараа Ц.Элбэгдоржид таслан сэргийлэх арга хэмжээ авсан нь дээрх хэрэгтэй нягт холбоотой байх нь дамжиггүй. Тиймдээ ч цагдан хоригдох эсэх нь мөн л цаг хугацааны асуудал болж үлдлээ.

Б.Лхам