УИХ-ын энэ удаагийн сонгуульд ах, дүү, амраг садангаараа өөр өөр нам, эвслээс нэр дэвших тохиолдол цөөнгүй бий. Тэдний нэг нь цагтаа дэнжийн 1000-н захаас бизнесийн гараагаа эхлүүлж, Их хурал хүртэл суга дэвшсэн Нарантуулын босс Ш.Сайхансамбуу.

Их хуралд нэг удаа сонгогдохдоо Оюутолгойгоос өөр сэдэвгүй байсан. Түүнийхээ гороор ч намдаа гологдож, УИХ-ын 2012 оны сонгуульд нэр дэвших квот авч чадаагүй. Улс төрөөс ингэж шахагдсан ч нэр нүүрээ бодсон уу, эсвэл ичсэндээ юү. Алийг нь мэдэхгүй. Зүгээр л өөрөө зай тавьж өгч байна гэсэн. Гэвч өнгөрсөн удаагийн сонгуулиар гэнэт гарч ирсэн. 

МАХН-ын лидерүүдээс эхлээд төрийн өнгийг толгойлж явсан нөхдүүдийг санхүүжүүлж явсан гэдгээ хэдэнтээ хүлээн зөвшөөрсөн тэрбээр өмнө сонгуулиар түүний төрсөн дүү Ш.Батсамбуутайгаа нэг тойрогт оноолт таарсан ч нэг нэгэндээ мөчөөгөө өгөлгүй тэмцсэнийх нь гороор АН-ын З.Нарантуяад боломжоо алдсан. Энэхүү үйлдлээрээ “жудаггүй” гэж ард түмний үнэлэгдсэн Завханчууд түүнд даанч итгэл хүлээлгээгүй.

Аргаа бараад “Үнэн ба зөв” намыг байгуулж, намын гол санхүүжүүлэгчээр ажиллах болсон бол дүү Ш.Батсамбуу нь ШИНЭ намын дэд даргаар ажиллах болж 2020 оны сонгуульд биеэ бэлдсэн.

Магад ах, дүү хоёр тэмцэлдээд хэн ч хожихгүй гэдгээ ойлгосон байх. Тиймдээ ч өмнөх сонгуулийн алдаагаа давталгүйгээр харин ч эвсэж орохоор шийдсэн нь ШИНЭ эвсэл.

Ийнхүү ах, дүү улстөрчийн залгамж халаагаар тодроод буй тэд энэ удаагийн сонгуульд санал хуваах төдийхнөөр оролцохоос бус иргэдийн саналыг татаж сонгогдохгүй нь тодорхой.

Хамгийн гол нь Ш.Сайхансамбуугийн хувьд энэ удаагийн сонгуульд эцсийн боломж. Тиймдээ ч төрсөн нутаг болох Завхан аймгаа өнгөрсөн дөрвөн жилийн хугацаанд багагүй усалж, ихээхэн найдлага тээгээд буй.

Учир нь Их хурлаар дамжуулж, ирэх онд болох Ерөнхийлөгчийн сонгуульд санаархаж буй бололтой. Үүнийгээ ч үгүйсгээгүй.

Энэ талаараа “УИХ-д нэр дэвшээгүй байж энэ талаар бодох эрт байна. Гэхдээ Ерөнхийлөгчийн сонгуульд өрсөлдөхгүй гэж хэлж байсан хүн нэр дэвшиж, сонгогдож байсан тохиолдол гурван удаа гарсан. Ц.Элбэгдорж бол “Хэзээ ч Ерөнхийлөгчид нэр дэвшихгүй. Ард түмнийхээ төлөө зүтгэнэ” гэж хэлдэг байсан шүү дээ. Гэтэл яалаа. Тэгэхээр хэлэхэд эрт байна” гэж хэлсэн.

Хэдий тэрбээр ийн сэрүүн зүүдэлж яваа монголчууд тэр дундаа Завханчууд даанч тэнэг хүмүүс биш.

Нарантуул захынхаа хэдэн түрээслэгчээ өвлийн хүйтэн бээрүүлж, зуны халуунд шарж яваагаар нь түүнийг ямархуу хүн бэ гэдгийг төвөггүй харчихаж болно. Тиймээс л түүнд улс төр зохихгүй гэдгийг мэдэхийн дээдээр мэдэж байгаа. Гэвч “дур эзнээ голохгүй” гэдэг шиг мөнгөтэй хүний зангаар улс төрөөс тийм ч амар явах сонирхолгүй байгаа бололтой.

Сүүлийн 20 жилд лидер төрсөнгүй. Лидер төрөөгүй болохоор улс төрийн завхрал эхэлсэн гэж байнга шахуу хэлдэг.

Тиймдээ улс төрийн нам байгуулж, тэмцэгчийн дүрээр олноо танигдсан Л.Отгонбаатар гэх залууг намын даргаар томилж, өөрөө ард нь хярсан.

Сүүлийн дөрвөн жилийн хугацаанд хөдөө орон нутгаар багагүй бэдэрсэн тэрбээр Завхан аймагт нэр дэвшихээр эртнээс зэхэж, тойргоо багагүй усалсан гэх. Үүнийх нь ч үр шим удахгүй гарах байх. Гэхдээ хүсэн хүлээсэн шиг Ш.Сайхансамбуу парламентад суудалтай намын дарга болох нь юу л бол.

Энэ ч утгаараа улс төрөөс явах цаг нь болсон нөхдийн тоонд тэрбээр зүй ёсоор багтаж буй. Үүнийг нь ч ганцхан сарын дараа болох сонгуулийн дүн батлан харуулах нь лавтай. Тиймээс л Завханчууд түүнд итгэл хүлээлгэх болов уу гэж асуув.