Нийслэлийн Инноваци, технологийн асуудал хариуцсан төслүүдийн удирдагч М.Халиунбат, нийслэлийн Шинжлэх ухаан, үйлдвэрлэл, инновацын газрын дарга Б.Бат-Эрдэнэ нар Япон улсын ЖАЙКА байгууллагын Монгол дахь Төлөөлөгчийн газрын дарга хатагтай Тамүра Эрико тэргүүтэй хүмүүстэй уулзах үеэрээ 10 мянган программист төсөл болон бүтээлч үйлдвэрлэлийг хөгжүүлэх төслүүдийг хэрэгжүүлэхэд  хамтран ажиллах талаар санал солилцсон билээ. 

Энэ хүрээнд нийслэлийн ИТХ-ын тэргүүлэгчдийн хурлаар ЕБС, МСҮТ болон их, дээд сургуулиудтай хамтран код бичдэг 10000 залуу программистыг бэлтгэх төслийг баталсан юм.

Тэгвэл төслийн нээлт өнөөдөр боллоо. Энэ талаар Нийслэлийн Инноваци, технологийн асуудал хариуцсан төслүүдийн удирдагч М.Халиунбат “Нийслэлийн хүн амын 71 хувийг 35-аас доош насны залуучууд эзэлдэг. Залуучуудын ихэнх нь ажилгүй байна. Тэднийг ажиллуулах ажлын байрны эрэлт хэрэгцээ мэдээлэл технологийн салбарт байна. Иймээс богино хугацаанд, өртөг зардал багатайгаар код бичиж, унших чадварыг эзэмшдэг тул үүнд багш нарыг сургаж, залуучуудыгаа бэлтгэн гаргахаар зорьсон" гэлээ.

Манай улсын оюутнуудын ердөө 2.3 хувь нь IT-ийн чиглэлээр суралцдаг нь хангалалттай үзүүлэлт биш юм байна.

Иймээс уг төсөл нь суралцагчдын тоог нэмэгдүүлж, эрэлтийг хангах боломж бүрдэх аж. Төслийн эхний ажлууд хийгдээд эхэлсэн бөгөөд Энэтхэгийн мэдээлэл технологийн их дээд сургууль болон компанитай хамтран ажиллах санамж бичиг байгуулжээ. Уг ажлын хүрээнд нийслэлийн мэдээлэл технологийн 375 багш нарыг код бичиж сургах, сурагчдад заах хөтөлбөрийг боловсруулаад эхэлсэн байна. Мөн төсөл хэрэгжих хоёр жилийн хугацаанд ерөнхий боловсролын сургуулийн 11, 12 дугаар ангийн сурагчдийн мэдээлэл зүйн хичээлийн агуулгад код бичих хичээлийг тусгахаар болсон байна. Цаашлаад мэргэжил сургалт үйлдвэрийн төвийг суралцагч нарт, их, дээд сургуулийн хичээлд нэмэлтээр тусгах юм.

Ташрамд дурдахад, Жайка байгууллага нь манай улсын нийгэм, эдийн засаг, байгаль орчны салбарт олон төсөл хөтөлбөр хэрэгжүүлэгч юм.