УОК-ын шуурхай штабаас “Улсын хэмжээнд нийт 1240 хүн тусгаарлалтад байгаагаас 450 хүн орон нутагт байна. Түүнчлэн ОХУ-аас 170 оюутан ирсэн. Эдгээрийн 93 хувь нь оюутан. 89 хувь нь эмэгтэй” гэлээ.

Харин Гадаад харилцааны яамны Консулын газрын дарга Л.Мөнхтүшиг “Энэ сарын 26, 27-нд Алтанбулаг боомтоор иргэдээ татан авах ажлыг зохион байгуулж байна. Газар дээр дэд хурандаа Б.Ууганбаяр, МХЕГ-ын дарга Цагаанхүү нар ажиллаж байна. Энэ ажлыг ОХУ, Буриад улстай хамтарч хийж байна. Нийт 594 орчим оюутан хилээр орж ирнэ.

Хилээр орж ирсний дараа төмөр замаар Улаанбаатар руу авчирч тусгаарлах байранд оруулна. Эдгээрийн дотор 200 гаруй цэргийн сонсогч байгаа.

Татан авах ажиллагаатай холбоотой олон гомдол санал ирсэн. Үүний нэг нь татан авах ажил удаашралтай байна гэсэн. Монгол Улсын хилээр 62 мянган иргэн орж ирсэн. Үүнээс 8400 гаруй иргэнийг зохион байгуулалттайгаар татан авснаас 3000 иргэнийг агаарын замаар оруулж ирсэн. Энэ бүх ажлын цаана 1000 орчим алба хаагч ажиллаж байна. ОХУ-аас 594 оюутан татан авсны дараа дараагийн татан авалтын хуваар гарна.

Монгол Улс иргэдээ татан авч байгаа улс орны нэг. Статистикаас харахад, БНГУ-ын дараа жагсаж байна. Солонгос, Япон, зүүн өмнөд Азид байгаа иргэдийн асуудал хүндэрч байгааг мэдэж байна. Сөүл дэхь Элчин сайдын яамнаас өдөр бүр мэдээлэл өгч байна. Токиогоос 1200 гаруй иргэн буцах хүсэлт гаргасан. Турк дэх иргэдийг бусад улсаар дамжин ирэх боломжийг судалж байна.

ОХУ-аас ирэх оюутнуудаас халдвар илрэх магадлалтай тул нөхцөл байдлыг харж байж дараагийн татан авалтыг товлоно.

Зарим иргэд гадаад руу явах асуудлыг асууж байна. Бид энэ талаар БНХАУ зэрэг улстай ярилцаж байна. Хэдийгээр зарим улс орнууд дэглэмээ сулруулсан. Гэхдээ хятад зэрэг улс орнууд гадаадын иргэдийг хилээрээ нэвтрүүлэхгүй байх хориг гаргасан. Энэ утгаараа хятад руу зорчих боломжгүй. Хятад иргэнтэй гэр бүл болсон иргэдийн асуудал мөн хамааралтай.

Солонгосын хувьд байнга оршин суух зөвшөөрөлтэй иргэд хилээр гарахаасаа өмнө буцаж орох зөвшөөрлийг Гадаадын иргэн харъяатын газраас нь заавал авах шаардлага тавьсан. Зөвшөөрөл авахгүйгээр ирээд буцах гэвэл 48 цагийн дотор ямар нэг шинж тэмдэг илрээгүй гэдгээ баталж байж хилээр нэвтрүүлнэ гэсэн. Шенгений орнууд мөн хязгаарлалт тавьсан” гэлээ.