Стартап бизнес эрхлэгч залуучуудын "Dreabers" нэгдлийн төлөөлөл өнөөдөр Ерөнхий сайд У.Хүрэлсүх болон Гадаад харилцааны сайд Д.Цогтбаатар, УИХ-ын гишүүн Н.Учрал нартай уулзаж санал бодлоо солилцсон юм.

Энэ үеэр стартапуудын зүгээс өөрсдийн саналаа Ерөнхий сайд У.Хүрэлсүхэд уламжилсан. Харин Ерөнхий сайд уг саналыг дэмжиж ажиллахаа илэрхийлээд Д.Цогтбаатар сайдад уламжилсан юм.

Ингэхдээ “Сайдад өөрийн гараар дамжууллаа. Хэрвээ энэ санаачилга ажил хэрэг болохгүй бол “Д.Цогтбаатар сайд “худалч” гэж насан туршдаа бодож яваарай” гэж наргиж хэллээ.

Энэ үеэр Д.Цогтбаатар сайд “Цар тахлын үед блокчэйн технологид суурилсан өгөгдөл маш чухал байна. Цар тахал цаашдаа гарна. Тиймээс аливаа асуудлыг даван туулахад мэдээллийн технологи асар их үүрэгтэй. Цахиурын хөндий шиг технологийн бүс нээж, татварын хөнгөлөлтөд хамруулдаг байх боломж бий. Бид ийм боломжийг бүрдүүлж стартап компаниудыг дэмжвэл стартапууд бойжих бүрэн боломжтой.  Хэрвээ залуучууд ийм хуулийн төсөл санаачилж оруулж ирвэл бид тусалж дэмжихэд бэлэн байна” гэсэн юм.

УИХ-ын гишүүн Н.Учрал “2012 онд Инновцийн тухай хуулийг баталсан. Дагаад 30 гаруй журам батлах ёстой байсан. Гэтэл Засгийн газрын шийдвэрийн дагуу Венчур хөрөнгө оруулалтын сан татан буугдсан. Энэ нь мэдээллийн технологийн компанидад хүндрэл үүсгэсэн. Тиймээс энэ санг дахин сэргээж өгөөч гэдэг хүсэлтийг удаа дараа уламжилсан.

Мөн Инновацийн тухай хуулийн нэмэлт өөрчлөлтийг батлуулсан. Энэ хуульд IT компаниудыг татварын бодлогоор дэмжихээр тусгасан. Өөрөөр хэлбэл, Засгийн газраас журам баталж хамтын оффист бүртгүүлсэн тохиолдолд татварын хөнгөлөлтөд хамрагдах боломжтой болно.

Түүнчлэн гарааны компаниуд олон нийтэд хувьцаагаа борлуулах боломжийг нь хангаж өгөхөөөр тусгасан. Үүнийг Засгийн газраас журам гаргаад шийдэх бүрэн боломжтой” гэлээ.

Уулзалтын төгсгөлд Ерөнхий сайд У.Хүрэлсүх “Манай залуучууд бусдаас бэлэн юм гуйхаа больсон. Зөвхөн дэмжлэг хүсдэг болсон. Энэ бол ололт, бас давуу тал. Энэ бол хөгжлийн философи. Та бүхэн улс орондоо хийж бүтээе. Амьдралаа өөрсдөө бүтээх тэмүүлэлтэй байна. Энэ бол давуу тал.

Манай Д.Цогтбаатар сайд бол намайг бодвол олон улс орноор явсан. Дэлхийг алган дээрээ тавьсан мэт мэддэг, ярьдаг хүн. Их инновацлаг хүн. Энэ мэдлэгээ залуустаа зарцуулаарай. Тэгээд ч удахгүй сонгууль болох гэж байна. Нэг юм бодно байгаа. Н.Учрал гишүүн хамтарч ажиллаарай. Ерөнхий сайдаасаа дэмжлэгийг нь аваад холбогч нь бол. Тэгж байж улс орон хөгжинө. Бусдаас хараат бус болно. Би Монгол Улсыг бусад улс орноос хараат бус байгаасай, болоосой гэж хүсдэг. Монгол Улсыг гэр бүлээр зүйрлэвэл нэг өрх шүү дээ.

Монголын ард түмэн хоёр том зах зээлтэй, азтай ард түмэн. Хэдий усан замын гарцгүй ч гэлээ шүү.

Энэ хоёр том зах зээлийг ашиглаж оюун ухааны бүтээлээ экспортлох ёстой. Бид үйлдвэрлэгч болох боломж бүрэн бий.

Бидэнд хүнд үйлдвэр алга. Химийн үйлдвэр алга. Байгаль дэлхий нь бараг онгон дагшинаараа байна. Дэлхийн хүн ам өдөр тутам өсөж байна. Хүн ам өсөхийн хэрээр хоол хүнсний хэрэгцээ нэмэгдэнэ. Бид үүнийг ашиглах ёстой. Тиймээс бид өөрсдөө бүх зүйлээ хийж, бусдад илүүчлэх замаар эдийн засгаа хамгаалж тэтгэдэг болох хэрэгтэй. Ийм боломж бидэнд бий. Ирэх 4-12 жилийн хугацаанд энэ бүхнийг амжуулж, эх орондоо сайхан амьдарцгаая.

Манай Н.Учрал гишүүн “Сумандаа сайхан амьдарцгаая” гэж сайхан хэлсэн. Энэ үнэн шүү. Бид эх орондоо сайхан амьдрах ёстой.

Цар тахал бидэнд их зүйлийг ойлгууллаа. Дэлхий нийтэд 60 сая хүн ажилгүй болсон байна. Коронавирус бидэн рүү өдөр, шөнөгүй гэтэж мярайж байна. Цар тахал бидэнд эх орон гэдэг ямар үнэ цэнтэй бэ гэдгийг ойлгуулсан. Тусгаар тогтнол гэж ямар үнэтэй бэ гэдгийг ойлгууллаа.

Бид эх орныхоо эзэн нь. Тиймээс бид хөгжүүлэх ёстой. Гадаадаас ирсэн залуус онгоцноос буугаад залбирч, мөргөж байна. Энэ нэг зүйл хэлж байгаа биз дээ. Эх орондоо эргэн ирэх хүсэлтээ 82 мянган иргэн гаргаснаас 72 мянгыг нь татаж авсан. Үлдсэн 10 мянгыг нь удахгүй татаж авна. Та бүхний хүсэлтийг хүлээж авлаа. Цаашид хамтарч ажиллая” гэлээ.