Төв аймгийн Баянжаргалан сум дахь цагдаа, цагдаагийн ахлах ахлагч Б.Соронзонбат нь 2020 оны дарөвдүгээр сарын 30-ны өдөр албан үүргээ гүйцэтгэх явцдаа сумын төв дэх эзэнгүй балгас дотор цэнэгтэй байлдааны онгоцны пулемётны сум байсныг илрүүлжээ. 

Улмаар дуудлага өгсний дагуу Зэвсэгт Хүчний Жанжин Штабын даргын тушаалаар томилогдсон тэсэрч дэлбэрэх зүйлийн хайгуул устгалын бүлгийнхэн  хамгаалалтад авч, аюулгүй байдлыг ханган хамтран ажилласан байна. Тус сумын нутаг дэвсгэрээс ФАБ-250 маркийн байлдааны онгоцноос хаях зориулалттай цэнэгтэй бөмбөг 12 ширхэг, 30 мм-ийн онгоцны пулемётны сум таван ширхэгийг тус тус илрүүлэн, олон нийтэд учирч болох эрсдлээс урьдчилан сэргийлсэн юм. 

Баянжаргалан сум дахь цагдаа, цагдаагийн ахлах ахлагч Б.Соронзонбат нь цагдаагийн байгууллагад 18 дахь жилдээ үр бүтээлтэй ажиллаж байгаа алба хаагч нарын нэг. Ийнхүү үүргээ амжилттай гүйцэтгэсэн тул Цагдаагийн ерөнхий газрын даргын тушаалаар Цагдаагийн гавьяа тэмдгээр шагнасан юм. 

Мөн энэ өдрөөс  өнөөдрийг хүртэлх хугацаанд Баянжаргалан сумын нутаг дэвсгэрт  Зэвсэгт хүчний 084 дүгээр ангийн алба хаагчид 28 хүний бүрэлдэхүүнтэй  очиж ажиллан 196 ширхэг байлдааны бөмбөг, сум илрүүлэн одоогоор устгах ажиллагаа үргэлжилж  байна. 

Тус газарт хуучин ЗХУ-ын нисэхийн цэргийн анги байрлаж байсан бөгөөд хэрэв тэдгээр галт хэрэгслүүдийг яаралтай олж илрүүлээгүй бол ойролцоох амьдарч байгаа ард иргэдийн амь насанд ноцтой аюул учрах байв.
Иймд иргэд та бүхэн  байлдааны сум, тэсэрч дэлбэрч болзошгүй зүйлс таарвал яаралтай  цагдаагийн байгууллагад дуудлага өгч,  аюул эрсдлээс урьдчилан сэргийлэхийг сэрэмжлүүлж байна.