Улаанбаатар хотыг стандарттай хот болгож, хувийн хэвшлийг үйлдвэрлэлээ тэлэх, бизнесээ өргөжүүлэхэд дэмжих, тэдний оролцоог нэмэгдүүлэх хууль эрхзүйн шинэчлэл хийх шаардлагатай байгаа юм.
Энэ хүрээнд Нийслэлийн ИТХ-ын дарга Р.Дагва “Хараа сүмбэр” ХХК-ийн барилгын материалын Жоби үйлдвэртэй танилцлаа. Хараа сүмбэр компани 1994 оноос үйл ажиллагаагаа явуулж байгаа бөгөөд 2013 онд дотооддоо Герман стандартаар барилгын материал үйлдвэрлэж эхэлжээ. Өнөөдрийн байдлаар барилгын гадна болон дотоод засал чимэглэлийн 53 нэр төрлийн бүтээгдэхүүнийг үйлдвэрлэж байна.
Тус үйлдвэр өдөрт хуурай болон шингэн материал 40 тонныг үйлдвэрлэх хүчин чадалтай. Гэвч одоогийн байдлаар захиалгаар буюу 50-60 хувьд нь ажиллаж байгаа аж. Мөн Жоби үйлдвэр нь 2018 оноос дотооддоо анх удаа замын тэмдэглэгээний цагаан будгийг үйлдвэрлэж эхэлсэн байна. Төрийн байгууллагууд дунджаар замын тэмдэглэгээний будгийг 1 метр квадратыг нь 28.000 төгрөгөөр авдаг бол Жоби үйлдвэр стандартад нийцсэн будгийг 9.200 төгрөгөөр санал болгодог гэдгийг “Хараа сүмбэр” ХХК-ийн ерөнхий захирал Б.Мөнх-Оюун хэллээ.
Энэ үеэр Нийслэлийн ИТХ-ын дарга Р.Дагва Улаанбаатар хотын бүтээн байгуулалтад хувийн хэвшлийн оролцоог нэмэгдүүлэх шаардлагатай. Улаанбаатарыг стандарттай хот болгож, хувийн хэвшлийг үйлдвэрлэлээ тэлэхэд эрхзүйн зохицуулалтаар дэмжиж ажиллана. Хувийн хэвшлээс орж ирэх хөрөнгө оруулалтын хэмжээг нэмэгдүүлж, эдийн засаг, бизнесийн өгөөжийг харна.
Ингэснээр ажлын байр бий болж, өрхийн орлого ч нэмэгдэнэ гэдгийг онцоллоо. Дашрамд дурдахад Монгол улсын хэмжээнд барилгын материалын 5 үйлдвэр үйл ажиллагаа явуулж байна. Эдгээр үйлдвэрүүд салбарын зах зээлийн 20-30 хувийг эзэлдэг. Манай улс жилд 1 сая ам.долларын үнэ бүхий эмульс, будгийг хэрэглэдэг байна.
