Эрүүл мэндийн яамнаас коронавирустэй холбоотой нөхцөл байдлын талаар ээлжит мэдээллээ хийлээ.
БНСУ-д ирэх зургадугаар сарын 1-ээс эхлэн анги танхимаа нээхээр болсон. Энэ хүрээнд хүүхэд хоорондын зайг барих, амны хаалтаа зүүх, анги танхимдаа хоол идэхгүй байх шаардлага тавьж байгаа аж.
Энэ үеэр ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа "АНУ-д нэг хоногийн дотор 25 мянган шинэ тохиолдол бүртгэгдлээ. Нас баралтын хувьд өмнөх өдрөөс харьцангуй буурсан үзүүлэлттэй байна. Харин халдвар тархалтын хэмжээгээр хоёрдугаарт орж байгаа Бразил улсад 16 мянган шинэ тохиолдол илэрч 158 мянга нь эдгэрчээ.
Мөн Өмнөд Америк, Чили зэрэг улсуудад халдвар эрчтэй тархаж байна. ОХУ-д шинээр 8900 гаруй тохиолдол бүртгэгдэж, нийт халдварын тоо 362 мянгад хүрлээ.
Номхон далайн баруун бүсийн орон тухайлбал, БНСУ-д 37 шинэ тохиолдол нэмэгдэж, эх уурхай нь тодорхойгүй халдвар тархаж эхэлжээ. БНХАУ-д өчигдөр гаднаас нэг тохиолдол илэрч, шинж тэмдэггүй 28 тохиолдол нэмэгдсэн” гэлээ.
А.Сүх
