Ерөнхий сайд У.Хүрэлсүх "Чингис хаан" музейн барилгын явцтай өнөөдөр танилцлаа. Тус музейн барилгыг хуучнаар Байгалийн түүхийн музей байсан 3500 м.кв талбайн газар дээр хоёр жилийн дотор байгуулах учиртай.  Музейн барилга нь нийт 20500 м.кв талбайтай, 15 үзэсгэлэнгийн танхимтай байхаар зураг төсөлд тусгасан. Доод давхруудыг түр үзэсгэлэнгийн танхимаар зохион байгуулж, олон улсын болон бусад үзэсгэлэнг тодорхой хугацаанд гаргаж байхаар төлөвлөсөн байна.

Барилгын ажил дээр өдөр, шөнийн ээлжинд нийт 170 орчим хүн ажиллагааг байгааг талбайн инженер танилцууллаа. Төлөвлөгөөний дагуу ирэх арванхоёрдугаар сард үндсэн барилга хүлээлгэж өгөхөөр ажиллаж байгаа аж. Импортын бараа бүтээгдэхүүн саатах явдал мэр сэр гарч байгааг Ерөнхий сайд У.Хүрэлсүхэд танилцууллаа.

Түүнчлэн барилгын нэгдүгээр давхарыг нь энэ долоо хоногт цутгаж дуусах бол 7-8 хоногт нэг давхарыг бүрэн цутгана гэхээр ирэх наймдугаар сард цутгалт бүрэн дуусгах төлөвлөгөөтэй ажиллаж байна.

Мөн суурин хэмжээ өмнөхөөсөө томорсон. Нийт есөн давхар, автомашины зогсоолтой, бүтэн тойрсон замтай байна. Пасатны чулууг 10 мянган тонныг яаралтай татах хэрэгтэй байгаа аж. Пасатны чулууныг цайвар өнгөөр сонгохоор төлөвлөсөн байна. 

Энэ үеэр Ерөнхий сайд У.Хүрэлсүх "Эзэн хааныхаа музейг барьж байгуулж байгаа барилгачдадаа баярлалаа. Бидний ирээдүй хойчдоо үлдээх томоохон бүтээн байгуулалт учир сэтгэлээ шингээж ажиллахыг хүсье" гэлээ. 

Ташрамд дурдахад, тус музейн үндсэн үзэсгэлэнгийн танхим нь гуравдугаар давхраас эхлэх юм. Тодруулбал,

• Гуравдугаар давхар- Хүннү, Сяньби, Жужан зэрэг гурван улсын үеийг харуулах үзмэрүүдийг байрлуулна. Нийт талбайн 60 орчим хувь нь үзүүлэнгийн танхим, бөгөөд үлдсэн хувь нь сан хөмрөгийн талбайтай байх аж. 
• Дөрөвдүгээр давхар-Түрэг, Уйгур, Кидан улсын үеийн танхим
• Тавдугаар давхар-Монголын эзэнт гүрэн
• Зургаадугаар давхар-Бүрэлдэхүүний улсууд
• Долдугаар давхарт-XV - ХХ зууны монголчууд
• Наймдугаар давхарт-Дэлхий дахин ба монголчууд
• Есдүгээр давхарт-Их хааны хүндэтгэлийн өргөө байрлана. 

Уг музей нь орчин үеийн музейн барилгын угсралтын шаардлагыг хангасан, төмөр бетон карказ, бетон дүүргэлттэй, галын аюулгүй байдлыг хангасан, агааржуулалтын систем сайтай хэмээн албаныхан онцолж байна.

Түүнчлэн суурийн давхарт үзмэрийг хүлээн авах, сэргээн засварлах, үзмэр бэлтгэх танхимууд байх бөгөөд музейн барилга зургаан лифттэй байх юм.