ОХУ-аас оюутнуудаа татан авах ажиллагаа үргэлжилж байна. Оюутныг тусгай автобусаар Сүхбаатар өртөө рүү хүргэнэ. Эндээс тугай галт тэргээр Улаанбаатар руу зорчуулж байна. Харин сэжигтэй тохиолдол илэрсэн тохиолдолд тусгай автомашинаар нийслэл рүү шууд хүргэж байгаа юм. Мөн өнөөдөр шөнийн 00.00 цаг хүртэл Алтанбулгийн боомтоор орж ирж байгаа бүх иргэдээ хүлээн авах аж.

Алтанбулаг боомтод Онцгой байдлын ерөнхий газрын дэд дарга, хурандаа Б.Ууганбаяр тэргүүтэй УОК-ын Шуурхай штабын бие бүрэлдэхүүн ажиллаж байна. Тэрбээр “УОК-ын Шуурхай штабаас Алтанбулаг боомтоор оюутнуудаа татан авчирч байна. Өчигдөр 342 хүн татсан. Татан авах ажиллагаанд Төмөр замын байгууллагаас олон улсын галт тэргээр дэмжлэг үзүүлсэн. Нэг галт тэргэнд 36 оюутан гэж тооцоолоод тээвэрлэлтийг тусгай түвшинд зохион байгуулж байна.

Улаан-Үд дэх Консулын газраас ирүүлсэн мэдээллээр 160 орчим оюутан замдаа явж байна гэсэн.

Иргэдээ татан авах ажиллагааны хүрээнд 590 орчим оюутан татна гэсэн тооцоо гарсан. Гэхдээ энэ тоо нэмэгдэх хандлагатай байна. УОК-оос тусгаарлах байр болон энэ хүртэл гаргасан зардлыг өөрсдөөс нь төлүүлэх шаардлага тавьж байгаа. Энд Хилийн мэргэжлийн хяналтын байгууллага, Зоонозын өвчин судлалын үндэсний төв, эрүүл мэндийн байгууллага болон зэвсэгт хүчний байгууллага шуурхай арга хэмжээ аван ажиллаж байна.

Мөн ариутгал, халдваргүйжүүлэлтийг шат шатанд нь бэлдэж байна. Хилийн боомтоор орж ирсэн зорчигчдоос Хилийн мэргэжлийн хяналтын байгууллага асуумж бөглүүлж сэжигтэй гэж үзсэн тохиолдолд тусгаарлах юм.

Өчигдрийн хувьд хилээр орж ирж байгаа зарим оюутнууд шинжилгээ хийлгэсэн байна лээ. Зарим нь шинжилгээгүй ирж байгаа. Бидний хувьд асуумжийг нь үзээд шинж чанараар ангилан хоёр хуваадаг” гэлээ.

А.Сүх