БНХАУ-ын Батлан хамгаалах яамнаас манай улсын Батлан хамгаалах яаманд коронавирусний халдвараас урьдчилан сэргийлэх, тэмцэхэд зориулан нэг сая юанийн үнэ бүхий эмнэлгийн хамгаалах хэрэгсэл, эмнэлгийн ажилчдын хамгаалалтын хувцас хандивлажээ.
Энэ үеэр Батлан хамгаалахын сайд Н.Энхболд "Манай улсын хувьд хил хязгааргүй тархаж байгаа цар тахалтай тэмцэхэд өөрөөсөө шалтгаалах арга хэмжээг авч хэрэгжүүлж байгаа. Олон улсын туршлага, ДЭМБ-ын зөвлөмжөөс харахад тэргүүн эгнээнд байгаа эмнэлгийн ажилтнуудыг халдвараас хамгаалах асуудал чухал байна. Ингэж чадсанаар эрүүл мэндийн салбарынхнаа хамгаалж, нийгэмд халдвар тархахгүй байх нөхцөл бүрдэнэ.
Цэргийн төв эмнэлэг коронавирусын халдвараас сэргийлэх, тэмцэх ажилд эрүүл мэндийн салбарын нэг бүрэлдэхүүн хэсэг болж үүрэг хүлээн ажиллаж байна. Манай эмнэлгийн эмч, ажилчид бүрэн бүрэлдэхүүнээрээ ээлжээр ажиллаж байгаа учир, тэднийхээ эрүүл мэндийг хамгаалах, гадагш халдвар алдахгүй байхад анхаарч ажиллаж байна. Хэдийгээр нөхцөл байдал хүнд байгаа боловч, бид хамтдаа цар тахалын гамшгийг даван туулна гэдэгт итгэлтэй байна" гэжээ.