АН-ыг мандан бадарч явах үед Хүүхдийн төлөө үндэсний газрыг толгойлох эрх авсан ч хүүхдийн төлөө бус харин ч хүний хүн гэдгээ батлан харуулсан нэгэн бол хатагтай И.Нарантуяа. Төвийн найман сая төгрөгөөр төгөлдөр хуур худалдаж авсан, албан өрөөгөө өндөр үнээр тохижуулсан, албан тушаалаа аваад удаагүй байхдаа 15 ажилтнаа нэгэн зэрэг шахуу халсан зэрэг асуудалд холбогдож явсан нь юу ч биш. Бүр АТГ-аас шалгалт хийхэд удаа дараагийн шийдвэрээр өөртөө илүү цагийн хөлс, урамшуулал авсан, өөрийн гар утасны төлбөрт зориулж байгууллагын төсвөөс 2014 онд 898 сая 575 мянган төгрөг, Тамгын газрын даргын ашигладаг утасны төлбөрт 1 сая 545 мянга 183 төгрөг, 2015 онд 398 мянга 781 төгрөгийг тус тусын үүрэн холбооны компанид шилжүүлсэн зөрчил илэрч байв. Энэ дагуу АТГ-аас салбарын сайд С.Эрдэнэд албан үүрэг өгсөн байдаг. Гэвч АН-аар хаягласан нөхдүүд нэг нэгнийгээ хамгаалж албан тушаалын цалинг хоёр сарын хугацаанд 30 хувиар бууруулах сахилгын шийтгэл оногдуулах төдийхнөөр хэрэг замхарсан.

И.Нарантуяа гэж хүнтэй холбогдох дуулиан ингээд дуусахгүй. Хөгжлийн банкны дуулианд нэр холбогдсон АН-ын гишүүдийн нэг.

Бүр тодруулбал, Хөгжлийн банкнаас хамгийн их хэмжээтэй зээл авсан 100 компанийн нэгээр түүний эзэмшилд бүртгэлтэй “Хурдны зам” компани багтдаг аж. Чингис бондоос нийт 19 тэрбум төгрөгийн санхүүжилт авсан гэх эл компанийг нь түүний нөхөр Ш.Бат-Энх эзэмшдэг.

АТГ-т мэдүүлсэн хөрөнгө орлогын мэдүүлгээс үзвэл, И.Нарантуяа нь 2012 онд 10 сая төгрөгийн орлогтой байсан бол 2014 онд 25 сая бол өссөн байна. Харин гэр бүлийн орлого нь 2012 онд 916.6 сая төгрөг байсан бол 2014 онд 139.5 сая болж огцом буурсан байгаа юм. Яагаад гэдэг нь тун хачирхалтай. Харин нийт 19.4 тэрбум төгрөгийн үнэ бүхий найман үйлчилгээний барилга, нэг орон сууцтай гэсэн бол “Ханталст”, “Хурдны зам”, “Төв эрдэнэ сант”, “Булнайн түшиг” гэсэн компаниуд болон гурван тусгай зөвшөөрөл эзэмшдэг гэжээ.

Гэтэл бүлийнх нь эзэмшлийн компаниудын нэг болох “Ханталст” компанийн ухсан нүхэнд тогтсон уснаас болж дөрвөн хүүхэд амь насаа алдаад байна.  

Угтаа бол хүүхдийн төлөө байгууллагыг нэгэн үе толгойлж, удирдан чиглүүлж явсан хүний хувьд иргэдийн аюулгүй байдлыг хангуулах тал дээр зөвлөөд заагаад, анхааруулчих сэтгэл И.Нарантуяад байх учиртай. Гэтэл нүдэн балай чихэн дүлий байж, зөвхөн амин хувийн ашиг хонжоо харж өдийг хүрснээс болж гурван гэр бүл үе залгамжлах нуган үрсээ алдлаа.

Одоогоос тав орчим жилийн өмнө дөрөвхөн настай охин харамсалтайгаар амиа алдсан хэрэг гарах үед И.Нарантуяа хатагтай Хүүхдийн төлөө үндэсний газрын даргаар ажиллаж байв. Тухайн үед тэрбээр “Эрх зүйн орчин болохгүй байна. Нэн яаралтай хуулиа өөрчлөх хэрэгтэй” гэх супер гэмээр хариулт хэвлэлд өгч байсан.

Нэг ёсондоо “Хийх хүнд боломж дүүрэн, хийхгүй хүнд шалтаг дүүрэн” гэгчээр хууль гарахгүй байна гэдэг шалтгаар өөрийгөө тойлсоор дараагийн сонгуультой золгосон.

Ингэхдээ УИХ-ын 2016 оны сонгуулийн үеэр АН-д 888 мянга 888 төгрөг хандивлаж, ирэх сонгуульд амжилт дагуулцгаая гэж уриалсан.

Гэвч тойргийнх нь иргэд түүнд итгэл хүлээлгээгүй. Тиймдээ ч улс төрөөс холуурхан байж, намын арын ажлыг гүйцэтгэж байна.

Ийм л хүний эзэмшлийн компаниас болж дөрвөн хүүхэд нар хорвоогоос халилаа. Гэтэл ар гэрийнхэнтэй холбогдож, уучлалт гуйх нь битгий хэл ядаж монголчуудаас ч уучлалт гуйсангүй.

Хүн шуналтай байж, эд хөрөнгө хурааж болно. Гэхдээ бусдад гэм хор хүргэхгүйгээр хүний ёс болоод бизнесийн алтан дүрмийн дагуу шударга байх ёстой. Гэсэн атал И.Нарантуяа, Ш.Бат-Энх нарт бизнесмэн, улстөрч хүний хувиар жаахан ч ёс зүй байсангүй. Тиймдээ ч төрийн шийдвэрийг үл ойшоож, дур мэдэн газар ухаж, барилга барьж байна. Бүхэл бүтэн 19 тэрбумын хөрөнгөтэй И.Нарантуяа хатагтайн шунал барагдах болоогүй юм гэж үү???.

Ийм л ёс зүй, үзэл баримтлалтай хүн хүүхдийн төлөө байгууллагыг толгойлж, хөрөнгөөр нь туйлж ирж. Түүнд болоод түүний гэр бүл төрийн албанд дахин залрах эрхгүй. Тэд дөрвөн бяцхан үрсийн амийг насаараа төлөх ёстой гэмтнүүд. Энэ бол цор ганц үнэн.

Г.Нацаг