Жил гаруйн өмнөхөн ФАТФ-ын “Саарал жагсаалт”-д орж асан Монгол Улс эргээд түүнээсээ гарах нөхцөлийг хангасан тухай Сангийн сайд Ч.Хүрэлбаатар тэргүүтэй ажлын хэсгээс мэдээлэв. Коронавирусийн цар тахлын хүрээнд эдийн засгийн агшилт мэдэгдэхүйц нөлөөлөх болсон ч ФАТФ-ын “Саарал жагсаалт”-аас гарах нөхцөлөө бүрэн хангаж, ажилласан нь бидний хувьд сайн мэдээ, сайд Ч.Хүрэлбаатар тэргүүтэй ажлын хэсгийнхэнд алга таших шалтгаан.

Улсаараа нэгдмэл нэг зорилгын төлөө урагшлах учиртай байтал сөрөг хүчин АН-ынхан хэн нэгэн сайдын нэрийг цоллож, тэр хэрээрээ улстөржүүлж байсан цаг саяхан.

Гэвч тэр цаг үеэс долоон сарын дараа “Саарал жагсаалт”-аас гарахаар болж буй нь өөрөө амжилт. Сангийн сайд Ч.Хүрэлбаатар "ФАТФ-ын нарийн бичгийн дарга нарын газраас тайлангийн дүгнэлт ирсэн. Дүгнэлтийн хамгийн сүүлийн хуудаст зургаан даалгавар бүгд хамгаалагдсан гэж бичсэн байна. Даалгавраа амжилттай биелүүлэхэд бүгд хамтран ажиллаж чадлаа. Тавдугаар сарын 4-нд үлдсэн үүрэг даалгаврыг 100 хувь хамгаалсан.

Ингэснээр Монгол Улс ФАТФ-ын өмнө нэр төртэй хамгаалж дууссанаа мэдэгдье" гэдгийг онцолсон.

Харин Төв банкны ерөнхийлөгч Б.Лхагвасүрэн “ФАТФ-ын өгсөн зургаан даалгаврыг биелүүлснээр Монгол Улс “Саарал жагсаалт”-аас гарах нөхцөлийг хангалаа гэж ойлгож болно. Төрийн байгууллагууд баг болж ажилласны үр дүн гарлаа гэж харж байна" гэсэн. Эндээс нэг зүйлийг харж болохоор. Сангийн яам, Төв банк, Санхүүгийн зохицуулах хороо зэрэг төрийн байгууллагууд өөр хоорондоо нэгдмэл, нэг баг болж ажилласны үр дүнд "Саарал жагсаалт"-аас гарах нөхцөлийг бүрдүүлж чаджээ.

Хэрвээ, АН-ынхны хэлсэн шиг хэн нэгэнд бурууг нь тохож, улстөржүүлсээр өнөөдрийг хүрсэн бол Монгол Улс "Саарал жагсаалт"-аас гарах нөхцөлөө хангах байсан эсэх нь эргэлзээтэй.

Харин Сангийн яам, Төв банк, Санхүүгийн зохицуулах хороо тэргүүтэй албаныхан нэг баг болж, ажилласны хүчинд ийнхүү сайн мэдээтэйгээр шинэ сарыг угтах нь. Улсын ажлыг урагш явуулахад улс төр хэрэггүй гэдэг нь энэ.

Монгол Улс 2019 оны аравдугаар сард ФАТФ-ын Саарал жагсаалтад ороход зургаан үүрэг даалгавар авснаас нэгдүгээр сард БНХАУ-ын Бээжин хотод болсон хурлаар гурван ажлыг хамгаалж, хангалттай гэсэн үнэлгээ авч байсан юм. Харин тавдугаар сарын 11-нд ФАТФ-д  үлдсэн гурван ажлаа хамгаалжээ.

Г.Эрхэс