УОК-ын Шуурхай штабаас гадаадад суугаа иргэдээ татан авах хуваарийн талаар мэдээлэл хийлээ.
Гадаад харилцааны яамны Консулын газрын дарга Л.Мөнхтүшиг “Татан авах ажиллагааг УОК-ын шийдвэрээр тасралтгүй үргэлжлүүлнэ. Үүний дагуу 10583 хүний хүсэлт байна. Бүс нутгаар нь үзвэл, дэлхийн өнцөг булан бүрт байгаа иргэлийн асуудал байна.
Тиймээс ирэх сард иргэдээ татан авах хуваарийг гаргалаа. Ирэх сард 2000 орчим иргэнээ татан авах төлөвлөгөө гаргасан. Нислэг үйлдэх хугацааг тусгаарлах байрны нөөц боломж, ХӨСҮТ-ийн бололцоо зэргийг харгалзан үзнэ. Казахстан улсаас 1097 иргэн хүсэлт гаргасны үндэслэн тусгай үүргийн нислэг үйлдэхээр төлөвлөсөн.
Мөн нутаг буцах хүсэлтэй байгаа Казахстаны 108 иргэнийг эх оронд нь очиход дэмжлэг үзүүлэх ажлыг зохион байгуулна. Ирэх сарын 11-нд Токио нислэг үйлдэхээр төлөвлөж байна. Хичээл сургууль нь дууссан оюутнуудын нөхцөл байдал хүндэрч байгааг ойлгож байна. Тиймээс ийм шийдвэр гаргасан. Япон улсын хувьд онц байдлаа цуцалсан. Энэ бүх хүчин зүйлийг харгалзан үзсэн.
Түүнчлэн Энэтхэг улсаас ламхай нарыг эх оронд нь авчрах талаар ярьж байсан. Хугацааг зургадугаар сарын дунд үед гэж төлөвлөсөн. Дараагийн нсилэгийг БНСУ руу хөөргөнө. Ингэхдээ зөвхөн транзит зорчигчдыг авна.
Европт байгаа монгол иргэд нутаг буцах хүсэлтэй байна. Европын орнуудад 2383 иргэн нутаг буцах хүсэлт өгсөн. Энэ хүрээнд Франкфурт руу нисгэнэ. Ирэх сард найман тусгай үүргийн нислэг үйлдэнэ.
Мөн ирэх зургадугаар сарын 24-нд УИХ-ын ээлжит сонгууль болно. Сонгууль боллоо гээд иргэдээ татан авах ажиллагааг зогсоохгүй. Мөн сонгуулийн үеэр ирэх иргэд сонгуулийн санал өгөх боломжгүй. УОК-оос гаргасан таван шалгуур болон бусад хүндэтгэн үзэх шалтгаантай иргэдээ татан авна” гэлээ.
А.Сүх