Ирэх зургадугаар сард бүх нийтийн амралтын өдөр гурван удаа тохионо. Тодруулбал, зургадугаар сарын 1-нд буюу ирэх даваа гаригт Олон улсын хүүхдийн эрхийг хамгаалах өдөр тохионо. Энэ өдөр бүх нийтээрээ амрах зохицуулалттай. Тэгвэл энэ сарын 5-нд буюу баасан гарагт Бурхан багшийн их дүйчин өдөр тохиох учир мөн бүх нийтээрээ амарна. Учир нь өнгөрсөн 2019 оны УИХ-ын намрын чуулганаар Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийг баталсан билээ. Хуулийн төслийг УИХ-ын гишүүн Д.Оюунхорол нарын есөн гишүүнээс өргөн мэдүүлсэн бөгөөд ингэхдээ Бурхан багшийн их дүйчэн өдөр буюу зуны тэргүүн сарын 15-нд бүх нийтээр амрахаар зохицуулсан юм.

Мөн чуулганы нэгдсэн хуралдаанаар УИХ-ын ээлжит сонгуулийн санал авах өдрийг 2020 оны зургадугаар сарын 24-ний өдөр байх тогтоолыг баталсан. Сонгуулийн санал хураалт авах өдөр бүх нийтээрээ амрах юм. Ингэснээр ирэх сард бүх нийтээрээ гурав хоног амарна.