Сүхбаатар дүүрэг дэх Цагдаагийн газар шинэ байртай боллоо. Нээлтийн ёслолд Хууль зүй, дотоод хэргийн сайд Ц.Нямдорж, тус цагдаагийн газрын дарга  болон бусад холбогдох албаны хүмүүс оролцлоо.

Энэ үеэр ХЗДХ-ийн сайд Ц.Нямдорж “Энэ ажлыг ажил хэрэг болгоход хамтарч ажилласан Д.Сандаг-Очир генерал, М.Хоролсүрэн хурандаа болон бусад холбогдох албаны хүмүүст баярлалаа. Би 12 жил хуулийн сайдаар ажилласан. Энэ хугацаанд бид бүхний мөрөөдөж, хүсч ирсэн зүйл бол цагдаагийн байгууллагыг байртай болгох, алба хаагчдаа орон сууцтай болгоё гэж зүтгэсэн. Хамгийн сүүлд 2017 оны сүүлчээр ХЗДХ-ийн сайдаар томилогдсон. Үүнээс хойш 2.6 жилийн хугацаа өнгөрч. Энэ хугацаанд С.Баатаржав генералтай хамтарч өмнө нь эхлүүлсэн ажлаа үргэлжлүүлсэн.

Хийх ажил их, хугацаа богино байсан.

Гэсэн ч 700 цагдаагийн алба хаагчийг орон сууцанд оруулах, бусад орон сууцны барилгыг ашиглалтад оруулсан. Хамгийн гол нь олон жил мөрөөдөөд хийж чадаагүй байсан Мөрдөн байцаах албаны конторыг найман сарын хугацаанд ашиглалтад оруулсан. 2019 онд Өвөрхангай, Баянхонгор, Дундговь аймаг дахь Цагдаагийн газрын барилга, мөн гурван дүүрэг дэх Цагдаагийн газрын барилга, замын хөдөлгөөний 32 пост зэргийг ашиглалтад оруулсан. Энэ нь 2017 онд бүрэн эрхээ авснаас хойшхи хийсэн ажлын нэгээхэн хэсэг. Үүнээс гадна Дотоод хэргийн их суруулиа сайхан тохижуулах юмсан гэж их бодсон. Сургуулийн барилга ашиглалтад орсон. Удахгүй номын сан ашиглалтад орно. Эмнэлгээ мөн аятайхан болгочихлоо.

Сүхбаатар дүүрэг дэх Цагдаагийн газрын хувьд шинэ барилгатай болгох гэж их хичээлээ. Зүтгэсээр байгаад ард нь гарлаа. Та бүхэнд баярлалаа. Тавилганы асуудлыг шийдвэрлэж, дэмжлэг үзүүлсэн Сүхбаатар дүүргийн ИТХ-д баярлалаа” гэлээ.