УИХ-ын гишүүн Б.Пүрэвдорж Өршөөлийн хууль санаачилжээ. Агуулгын хүрээнд “Өршөөл”-ийн гэх боловч нэршил нь Зөрчлийн хуулиар торгуулсан иргэдийг нэг удаа өршөөх. Гишүүн Б.Пүрэвдоржийн тайлбарласнаар 2017 оноос мөрдөж эхэлсэн Зөрчлийн тухай хуулиар 1.4 сая иргэнийг 464 тэрбум төгрөгөөр торгосонтой холбоотой гэнэ.

Үүнийг нийт иргэнд шилжүүлбэл нэг хүнд 140 мянган торгууль ногдуулсан гэдгийг тэрбээр онцолсон байна.

Тэрбээр “Ховд аймгийн Булган суманд 1600 орчим хүн нийтдээ хоёр сая төгрөгөөр торгуулсан байна. Хэрвээ торгуулийн мөнгийг төлөхгүй бол тэнэсэн ялтай болдог. Ховдын Булган, Алтай сумаар тэнэсэн ялтай хүн их байна. Тиймээс Зөрчлийн хуулиар хариуцлага хүлээхэд өршөөх хуулийн төслийг өргөн барьж байна" гэжээ.

Б.Пүрэвдорж гишүүний хэлсэнчлэн Зөрчлийн хуулиар 1.4 сая иргэн торгуулсан гэх ч өөрийнх нь нэр дэвшиж байгаа Ховд аймагт буй 1600 иргэнийг торгуулиас чөлөөлүүлэхийн тулд хуулийн төсөл санаачилсан нь илт.

Өөрөөр хэлбэл, Б.Пүрэвдорж гишүүний өргөн барихаар болсон хуулийн төслийг УИХ-аар хэлэлцэж, баталбал тэрбээр нэр дэвшиж буй тойрогтоо сайн нэртэй хүнээр тодорно.

Хэлэлцэхгүй байсан ч хуулийн төсөл өргөн барьснаа танилцуулж, түүнийгээ батлуулахын төлөө тэмцэхээ илэрхийлж таарна. Ийм нэгэн хоёр үзүүртэй зүү шиг төсөл бодож олсныг нь Б.Пүрэвдорж гишүүний заль гэж харахаас өөр аргагүй. Уг нь дээрх хуулийн төслөө өмнө нь өргөн бариад УИХ-аар хэлэлцүүлэх хангалттай цаг хугацаа түүнд байсан уу, гэвэл байсан. Гэвч УИХ-ын сонгуулийн цикл бүрт гэнэтхэн сайн хүний дүрээр тодордог нь улстөрчдийн гэм биш зан.

Г.Эрхэс