Эдийн засагч Л.Наранбаатар Ерөнхийлөгчийн Тамгын газрын дарга асан, АН-ын дарга С.Эрдэнийн ахлах зөвлөх З.Энхболдыг ам авч Баянзүрх дүүрэгт нэр дэвших хүсэлтээ өгөөд байсан. Гэвч түүнийг Сонгуулийн ерөнхий хорооноос хоёр газраас нэр дэвшсэн гэх шалтгаанаар нэр дэвшигчийн үнэмлэх олгохоос татгалзжээ. 

Энэ талаар тэрбээр “Зөв хүн электорат хөдөлгөөний саналаас албан ёсоор татгалзсан атал Сонгуулийн ерөнхий хороо намайг хоёр газраас нэр дэвшсэн гэх шалтгаар өрсөлдөх боломжийг минь хууль бусаар хаалаа. Тус эвсэлд өргөдөл, анкет огт өгөөгүй. Хуралд нь ороогүй. Албан ёсоор "Сахигтун! Үндсэн хуулийн-19" эвслээс УИХ-ын 22 дугаар тойрог /Баянзүрх дүүрэг”-т З.Энхболдтой өрсөлдөхөөр нэр дэвшсэн. Шударга ёс хаана байна аа.  Шүүхдэнэ” гэжээ.

Түүний хэлсэнчлэн СЕХ үндэслэлгүйгээр буруутгаж, нэр дэвших эрхийг нь хассан бол шүүхдэлцэх ойлгомжтой.

Гэхдээ үүнээс илүүтэй түүнийг ийн бүртгээгүй шалтгааны цаана АН-ын дарга С.Эрдэнийн ахлах зөвлөх З.Энхболдтой холбоотой гэх яриа гараад байна.

Учир нь З.Энхболдтой ана мана үзэлцэж ирсэн хүний нэг нь Л.Наранбаатар. Тэд нэг тойрогт учраа таарснаар З.Энхболдод халтай шийдвэр болсон. Энэ ч утгаараа Л.Наранбаатарыг бүртгүүлэхгүй байхад нөлөөлсөн байж болзошгүй, ингэхдээ АН-ын ҮБХ-ны гишүүн, УИХ-ын гишүүн З.Нарантуяаг "ашигласан" байх талтай гэж буй.

Учир нь УИХ-ын гишүүн З.Нарантуяагийн нөхөр нь Сонгуулийн ерөнхий хорооны ажлын албаны даргаар ажилладаг.

Энэ утгаараа ашиг сонирхолын зөрчилтэй гэж зарим иргэд хардсаны үндсэн дээр АТГ-т шалгуулахаар өгөөд байсан юм. 

Тэгвэл Л.Наранбаатар нэр дэвших боломжоо алдсаны цаана уг сүлжээ байхыг үгүйсгэхгүй гэх хардлага нийгэмд үүсээд байна. Үнэн худлыг мэдэхгүй ч эдийн засагч Л.Наранбаатар СЕХ-ны байранд хэвлэлийн хурал зарласан байна. Тэрбээр шударга бус явдлыг илчилнэ гэсэн юм.

Юутай ч З.Энхболд гэдэг хүн өөрийн өрсөлдөгчдөө замаасаа нэг нэгээр нь ийн зайлуулж эхэлсэн бололтой. Учир нь АН-ын гишүүн, НИТХ-ын төлөөлөгч М.Тулгатыг нэр дэвшүүлэх гэсэн шийдвэрийг ҮБХ-ноос шийдсэн. Үүнтэй нь холбогдуулж З.Энхболдыг залуучуудын боломжийг хулгайлсан хулгайч гэж М.Тулгат цоллож байв.

М.Тулгатын хэлсэнчлэн З.Энхболд нь боломжийг хулгайлдаг хулгайч байгаад Л.Наранбаатарыг нэр дэвших эрхийг "хасуулсан" бол төрд ойртуулж болохгүй хүний нэг мөнөөс мөн болох юм. 

Г.Нацаг