Эрүүл мэндийн яамнаас коронавирусний цаг үеийн асуудлаар мэдээлэл хийлээ.
Энэ үеэр ХӨСҮТ-ийн Тандалт, судалгааны албаны дарга А.Амбасэлмаа “Энэ сарын 1-нд ХӨСҮТ-ийн хоёр, Дархан-Уул аймгийн салбар лабораторид нийт 212 хүний шинжилгээ хийгдсэн. Бүгд сөрөг гарсан.
Тухайлбал, тандалтын зорилгоор гурав, ХӨСҮТ-д тусгаарлагдсан найм, ажиглах байранд нэг хүний давтан шинжилгээ хийгдсэн. Мөн Истанбул-Улаанбаатар чиглэлийн нислэгээр ирсэн зорчигчдын давтан шинжилгээ хийгдсэн. Бид ажиглах байранд байгаа иргэдээс ДЭМБ-ын зөвлөмжийн дагуу иргэдийг ирмэгц болон 7, 14, 21 хоногуудад давтан шинжилгээ авдаг. Мөн гэрийн ажиглалтад шилжсэний дараа хоёр удаа шинжилгээ авдаг.
Түүнчлэн Алтанбулгийн боомтоор ачаа тээврийн 10 жолоочоос шинжилгээ авсан. Одоо нийт батлагдсан 185 бий. Үүнээс 141 нь ХӨСҮТ-д эмчлэгдэж байна. Эмчлэгдэж байгаа хүмүүсийн ор хоног 14-52 хоног, дундаж нь 30 хоног байна. Хүйсийн хувьд ихэвчлэн эрэгтэй хүмүүс байна.
Мөн халдварын илэрч байгаа гол шинж тэмдэг нь хоолой өвдөх, толгой өвдөх, хамар битүүрэх, дотор муухайрах, амьсгал давчдах, ядрах, сульдах зэрэг шинж тэмдэгтэй.
Өнөөдрөөс эхлээд гурван хоногийн хугацаатай ХӨСҮТ-ийн захирал Д.Нямхүүгээр ахлуулсан баг Сэлэнгэ аймгийн Алтанбулаг боомтод ажиллаж байна. Тэнд хилийн нөхцөл байдлын талаар зөвлөгөө зөвлөмж өгч, дасгал сургуулилт хийх юм" гэлээ.
А.Сүх
