Аймгийн Засаг дарга нараас хууль хяналтын байгууллагын үүдийг багагүй сахисан хүн нь Архангай аймгийн Засаг дарга Ц.Мөнхнасан. Засаг дарга уу, АТГ-ын сахиул уу гэдгийн алин нь болох нь мэдэгдэхгүй шахуу болтлоо хэвлэлээр баалуулсан түүнд холбогдох авлига, албан тушаалын гэх бараан түүх багагүй бий. Хамгийн наандаж л аймгийн ИТХ-ийн дарга Б.Өсөхбаярын хамт АТГ-т шалгагдсан.

Асуудал нь аймгийн ИТХ хуралдаагүй байхад хуралдсан мэтээр баримт бүрдүүлж, Цэнхэр сумын таван га талбайг бичил уурхайн зориулалтаар орон нутгийн тусгай хэрэгцээнд авч, дүгнэлт гаргуулахаар шийдвэрлэсэн нь эрүүгийн хэрэгт татах үндэслэл болсон гэх. Үүнээс гадна ХААИС-ийн хүрээлэнгийн захирлыг дарамталж, зодсон. Аймгийн төвд баригдсан худалдааны төвийн барилгад 3,25  тэрбум төгрөг төсөвлөж, төсвөөс гаргасан гээд АТГ-ын сахиулаар тодроод байсан тэрбээр шүүх засаглалтай муур, хулгана болж тоглож байна.

Энэ нь Ц.Мөнхнасан дарга Хайрхан сумын МАН-ын дарга Н.Отгонбаярын гэргийг ихэд анхаарч ажлын байртай болгож үйлээ үзэж буй бололтой.

Тодруулбал, Хайрхан сумын ЕБС-ийн Г.Баярбатыг 2017 оны долдугаар сарын 25-нд үүрэгт ажлаас нь халах тухай захирамжийг Засаг дарга Ц.Мөнхнасан гаргасан байна. Шалтгаан нь аймгийн Засаг даргатай 2017 онд хамтран ажиллахаар байгуулсан үр дүнгийн гэрээгээр хүлээсэн үүргээ хангалтгүй биелүүлсэн зэрэг асуудал.
 

Асуудлыг нэг талаас нь харвал, аймгийн Засаг даргын хувьд байж болох шаардлага тавьсан гэж харахаар. Гэвч асуудлыг ухаж үзвээс өөр болох нь харагдана.

Өөрөөр хэлбэл, ажлаасаа халсан шийдвэрийг Г.Баярбат хүлээн зөвшөөрөөгүй учир шүүхэд ханджээ. Тэрбээр “Хайрхан, Булган, Цэнхэр сумын сургуулиудтай тодорхойгүй шалтгаанаар үр дүнгийн гэрээ байгуулаагүй. Үр дүнгийн гэрээ байгуулъя гэхээр Ц.Мөнхнасан дарга завгүй байна гэдэг байсан. Гэтэл 2017 оны дөрөвдүгээр сарын 28-нд гэрээ байгуулж, үүнээс нэг сарын дараа буюу зургадугаар сарын 5-нд үр дүнгийн тайлан авсан. Ингээд үр дүнгийн тайлан хангалтгүй гэсэн. Угтаа бол манлайллын зорилт, мэдлэг ур чадвараа дээшлүүлэх, тусгай зориулалтын арга хэмжээ гээд нийт 60 гаруй арга хэмжээний үр дүнгийн гэрээний хавсралтаар ирдэг. Би тайлангаа 37 хоногт багтааж, арай хийж бичсэн” гэсэн тайлбар шүүхэд өгчээ.

Ингээд шүүхээс Ц.Мөнхнасангийн захирамж хуульд нийцэхгүй гэж Г.Баярбатыг ажилд нь эргүүлж авах шийдвэр гаргажээ. Шүүхийн шийдвэрийн дагуу 2018 оны арванхоёрдугаар сарын 21-нд ажилд нь эргүүлж авсан ч гуравхан сарын дараа дахиад халсан байна. Энэ нь ажлаа тасалсан гэх “аман” үндэслэл.

Г.Баярбат захирал хэзээ, яаж ажлаа тасалснаа мэдэхгүй учир шүүхэд дахиад л хандсан байгаа юм. Шүүхээс мөн л ажилд нь эргүүлж ав гээд шийдэж.

Засаг дарга Ц.Мөнхнасан ч шүүхийн шийдвэрийг биелүүлж, энэ оны хоёрдугаар сард ажилд нь аваад эргүүлээд өнгөрсөн тавдугаар сарын 7-нд халжээ.

Эл процессоос харвал, Хайрхан сумын ерөнхий боловсролын сургуулийн захирал Г.Баярбат сандал, ширээнээсээ зулгаацалдаж, Засаг дарга Ц.Мөнхнасан нь үүнд өширхсөн гэж харагдахаар. Гэвч үүний цаана өнөө л жалга, довны үзэл байгаа бололтой юм.

Энэ нь Г.Баярбатыг ажлаас нь халах бүртээ тус сумын МАН-ын дарга Н.Отгонбаярын гэргийг Э.Ундармааг оронд нь томилдог аж. Эл шийдвэрийг тус сургуулийн багш, ажилчид хэчнээн эсэргүүцээд ч нэмэргүй, харин ч ад шоо үзэгдэх дээрээ тулсан байна.   

АТГ: Ц.МӨНХНАСАН АШИГ СОНИРХЛЫН ЗӨРЧИЛТЭЙ ТОМИЛГОО ХИЙСЭН

“Өт хүртэл биед нь хүрэхэд арвалздаг” гэж үг бий. Мөрөөрөө ажлаа хийж явахад нь ялих ялихгүй шалтагаар удаа дараа ажлаас нь халахаар Г.Баярбатад хардлага төрж. Тиймээс Авлигатай тэмцэх газарт өргөдөл гаргажээ. АТГ-ын шалгалтаар Архангай аймгийн Засаг дарга Ц.Мөнхнасан нь Хайрхан сумын ЕБС-ийн захирлын үүрэг гүйцэтгэгчээр Э.Ундармааг 2017 оны долдугаар сарын 25-ны өдөр болон 2019 оны хоёрдугаар сарын 18-нд томилсон нь хувийн ашиг сонирхлыг урьдчилан хянуулаагүй нь ашиг сонирхолын зөрчилтэй томилгоо хийгдсэн гэж ойлгогдохуйц нөхцөл байдлыг бий болгосон байна.

Тиймээс дахин ийм зөрчил гаргахгүй байх, хууль, журмын биелэлтийг хангаж ажиллахыг Архангай аймгийн Засаг дарга Ц.Мөнхнасанд албан бичиг хүргүүлсэн болно гэдэг утга бүхий албан бичгийг АТГ-ын хяналт шалгалт, дүн шинжилгээний хэлтстийн дарга, эрхэлсэн комиссар Х.Хашбаатар хүргүүлжээ.

Хамгийн гол нь АТГ-аас ингэж болохгүй, хууль бус байна гээд шалгаж тогтоогоод бичиг явуулсаар байтал өнөөг хүртэл өөрийнхөө үйлдэлд Ц.Мөнхнасан дарга өчүүхэн ч дүгнэлт хийсэнгүй. Харин ч өмнөх дутагдлаа дахин дахин давтсаар л...

ХЭН НЬ ХЭН БЭ?

Бид энд хэн нэгний талд орж, өмгөөлж, хайцаалж, эсвэл харлуулах гэсэнгүй. Хамгийн гол нь аймгийн удирдлагууд жалга, довоороо хуваагдаж, хэт намчирхсан шийдвэр гаргаснаас болж эгэл жирийн төрийн алба хаагчид хохирч байна. Ийм үзэгдэл гаарсныг хууль хяналтын байгууллагаас тогтоосон. Яг үүний тод жишээ нь Г.Баярбат захирал. Түүний хувьд 2006 -2014 он Архангай аймаг дахь Мэргэжил сургалт үйлдвэрлэлийн төвд мэдээлэл зүйн багшаар ажилласан туршлагтай. Ингээд 2014-2015 он тус аймаг дахь Мэргэжил сургалт үйлдвэрлэлийн төвд Түншлэл олон нийттэй харилцах мэргэжилтнээр ажиллаж байгаад сургалтын албаны даргаар ажилласан. Улмаар 2016 оноос Хайрхан сумын ЕБС-ийн захирлаар ажиллах болж. Боловсролын салбарт нийт 14 дэх жилдээ ажиллаж буй туршлагатай нэгэн.

Гэтэл улс төрийн албан тушаалтан болох Засаг дарга Ц.Мөнхнасан гэдэг хүн түүнийг гурван удаа өөрийн үзэмжээр халж, хоёр удаа шүүхийн шийдвэрээр ажилд нь буцаан томилсон.

Нэг үгээр хэлбэл, Ц.Мөнхнасан гэдэг хүн шүүхтэй муур, хулгана болж тоглох зуур Хайрхан сумын ЕБС-д хөл толгой нь олдохгүй эмх замбараагүй байдал үүсээд байна. Учир нь сургуулийн багш, ажилчид болоод үйлдвэрчний эвлэлээс Г.Баярбатыг ажлаас нь халсан нь хууль бус хэмээгээд төрийн алба нь улс төрийн намаас ангид үйл ажиллагаа явуулах ёстой гэж эсэргүүцэж байгаа юм. Тиймдээ ч БСШУС-ын сайд Ё.Баатарбилэгт сургуулийн хамт олноос өнгөрсөн тавдугаар сарын 28-нд буюу өнгөрсөн дүрэв гарагт бичиг хүргүүлжээ. Сургуулийн хамт олон аль нэг нам, эвслийг дагаж эсэргүүцэл үзүүлсэнгүй.

Харин ч төрийн албыг улс төрийн нам, эвслээс ангид байлгаж, шударгаар хөдөлмөрлөж яваа нэгнийг улс төрийн өнгөөр гадуурхаж, хавчихыг эсэргүүцэж буй юм.

Тиймээс Ц.Мөнхнасан дарга аа, та ажлаа хийвэл хий. Үгүй бол сандал ширээгээ эртхэн шиг хүлээлгээд өгчих. Төрийн алба төрлийнх биш, тэр дундаа намчирхсан үзлээс ангид байх ёстойг та өнөөг хүртэл ойлгоогүй юм бол бүхэл бүтэн нэг аймгийн толгойлж суух эрх танд алга гэдгийг цохон тэмдэглье.

Г.Маргад