Гудамжны тэмцэгчээс улс төрд орох гараагаа эхэлсэн О.Магнай ШӨХТГ-ын даргаар 2012-2014 оны хооронд ажиллаж байгаад УИХ-ын 2016 оны сонгуульд нэр дэвшсэн ч өвдөг шороодсон.  

Жилийн орлого нь хэдхэн саяар хэмжигдэх атлаа тэрбумын хөрөнгөтэй тухайн хурган дарга нарын нэгд тухайн үед тооцогдож байв.

Тодруулбал, ШӨХТГ-ын даргаар томилогдохдоо жилийн 3.1 сая төгрөгийн орлоготой байсан бол ажлаа авснаас хойшхи нэг жилийн дараа орлого нь 10 сая төгрөг болж өссөн байдаг. Мөн гэр бүлийн орлого 0 гэж мэдүүлсэн бол  1 ТЭРБУМ 120 САЯ төгрөгийн үнэтэй орон сууц, барилга байгууламжтай, 250 сая төгрөгийн үнэтэй автомашин, 20 сая төгрөгийн газартай,  гэж мэдүүлж байжээ.

Гэвч УИХ-ын 2016 оны сонгуульд тахимаа өгснөөс хойш ажин түжин байсан тэрбээр дахин нэг хэл аманд ороод буй.

Энэ нь гаднын иргэнийг залилж, их хэмжээний хөрөнгийг өөрийн эзэмшил болгосон гэх дуулиан. Энэ талаараа tovch.mn сайтад өгсөн тодруулгадаа “Хуулийн дагуу болсон процесс. Гурван шатны шүүхийн шийдвэрийн дагуу хөрөнгө гэр бүлийн хамаарал бүхий этгээдийн нэр дээр шилжсэн. Өөрөөр хэлбэл, ээжийн нэр дээр компани, барилга, газар шилжсэн” гэдэг тайлбар өгсөн байдаг.

Харин түүнд залилуулсан гэх гадаад иргэн “О.Магнай тухайн үед өндөр албан тушаал хашдаг байсан. Би түүнд итгэсэн. Газрын зөвшөөрөл шижлүүлэхийн тулд надаас их хэмжээний мөнгө нэхсэн. Би өгсөн. Үүний дараа барилга барьсан.

Гэтэл миний хөрөнгөөр авсан газар, барилга хоёр хоёулаа О.Магнайгийн эзэмшил болсон байсан.

Намайг Монгол Улсын хил рүү нэвтрүүлээгүй. Үүнд түүний нөлөө бий гэж бодож байна. Монгол руу очиж чадахгүй болохоор би яаж ч чадахгүй байна” гэх утгатай мэдэгдлийг цахим орчинд түгээсэн юм.
Ийнхүү бусдын хөрөнгийг залилсан гэх асуудлыг хуулийн хүрээнд болсон процесс гэж тайлбарласан О.Магнайгийн хөрөнгө маш их хэмжээгээр буурсан байна. Тухайлбал, АТГ-т өгсөн мэдээгээр жилийнх нь орлого 1.2 САЯ төгрөг, 655 САЯ төгрөгийн орон сууц, бусдаас 40 сая төгрөгийн авлагатай гэж мэдүүлсэн байна.

Тэрбээр ШӨТХГ-ын даргаар ажиллаж байхдаа “Төгс бүтээн байгуулалт”, “Би-Эм-Си-Эм”, “Стийлвинг”, “Анаг сархиа”, “Аядекс” гэсэн компаниудын хувьцааг эзэмшдэг гэсэн бол энэ удаа “Лекс бизнес партнерс”, “Дархан цамхаг” гэсэн хоёр компанийн хувьцааг 50-100 хувь эзэмшдэг гэжээ.

Ташрамд дурдахад, УИХ-ын 2020 оны ээлжит сонгуульд нэр дэвшигчдийн ХОМ-ийг АТГ-аас цахим системд байршуулсан юм.

Сонгуулийн ерөнхий хороонд нийт 640 нэр дэвшигч өргөдлөө өгсөн боловч нийт 606 иргэн нэр дэвшигчийн үнэмлэхээ гардан авсан юм. Тиймээс АТГ-аас эдгээр 606 нэр дэвшигчийн хөрөнгө, орлогын мэдүүлгийн хураангуйг http://www.xacxom.iaac.mn холбоосоор үзэх боломжтой. 

Г.Нацаг