МАХН-ын аврагчаас АН-ын "урвагч" болж хувирсан О.Баасанхүү гишүүний барцад дуусах болоогүй бололтой. Генерал Б.Хурцын дэслэгчээр тодорч, Эрдэнэтийн экс дарга Т.Бадамжунайд зүтгэхээр санаархаж буй бичлэг задраад хэдхэн хонож буй. Архи ууж чадахгүй нь том алдаа байсан гэж үнэнээ өчсөн ч ард түмэн түүнийг уучлаагүй. Аргаа бараад УЕП-т гомдол гаргаж, бичлэгийн ул мөрийг хайлгахаар зэхсэн ч амжилт олоогүй л байна.

Тэгвэл “Дэслэгч Баасанхүүгийн хоёрдугаар ангийн бичлэг тун удахгүй задрана” гэсэн шуум цахим орчинд цацагдах болов.

Хэрвээ энэ үнэн бол О.Баасанхүү гишүүний барцад нээгдсэн болж таарна. Цагтаа МАХН-ын нэр нүүрийг парламентад талхалж, чуулганы индрээс оргүй биш ортой, чулуутай үг шиддэг гишүүний тоонд багтаж явсан нэр нь хүнд ийнхүү шавар шавхайтай хутгалдах юм гэж хэн санах билээ. Юутай ч түүний талаарх бичлэг задарбал, тэрбээр Эрдэнэтчүүдийн нүүрийг дахин харах эрхгүй болох нь дамжиггүй.

Ингээд Их хуралд хоёр удаа дэвшсэн ч эцэстээ “дэслэгч” гэх гуншин зүүсэн О.Баасанхүү гишүүний хөрөнгө орлогийг танилцуулъя.

Түүний хувьд парламентад хоёр удаа сонгогдсон ч хөрөнгө орлого нь нэг их өөрчлөгдөөгүй хуруу дарам гишүүний нэг юм. Түүний нэг жилийн орлого нь 22.7 сая төгрөг бол гэр бүлийн орлого нь 24 сая төгрөг. Нийт 395 сая төгрөгийн орон сууц, 33 сая төгрөгийн автомашин, 70 сая төгрөгийн автомашин, 80 сая төгрөгийн газартай.

Гэсэн ч хадгаламж, картын үлдэгдлээ жил тутам бага багаар тордож яваа нэгэн юм байна. Өнгөрсөн жилийн өдийд 70.2 сая төгрөгийн үлдэгдэлтэй байсан данс нь өдгөө 82.8 сая бол өсчээ. Хачирхалтай нь, УИХ-ын гишүүн болох үедээ л бусдаас 152 сая төгрөгийн авлагатай гэж АТГ-т мэдүүлж байсан.

Гэтэл бүхэл бүтэн зургаан жил болоход өнөө авлагаа авч чадаагүй л яваа аж. Түүнийг "мурьсан" хүн хэн бэ. Эсвэл хий авлага юм болов уу.

Г.Маргад