УИХ-ын гишүүний бүрэн эрхээсээ түдгэлзсэн Н.Номтойбаярыг энэ сарын 28-нд шүүхийн шийдвэрээр цагдан хорьсон билээ. Уг шийдвэр нь нэр дэвшигчийг Сонгуулийн ерөнхий хороонд урьдчилж мэдэгдэлгүйгээр баривчилсан хууль бус шийдвэр байсан юм.

Тэгвэл түүнийг ийн хууль зөрчин саатуулсныг эсэргүүцсэн залуус Цагдан хорих 461 дүгээр ангийн гадаа тайван жагсаал хийлээ.

УОК-ын шийдвэрийн дагуу цар тахлын үед олноор цугларах бол иргэн хоорондын зайг 1.5 метр байхаар зааварчилсан. Энэ дагуу жагсагчид өөр хоорондын зайг баримталж, тайван жагссан байна. 

Жагсагчид "МАН өрсөлдөгчдөө хууль зөрчиж замаасаа зайлуулж байна. Тэр дундаа үнэн, худлыг дэнслэх учиртай шүүх засаглал хууль зөрчиж нэр дэвшигчийг цагдан хорих шийдвэр гаргаснаа залруулах ёстой" гэж шаардсан бөгөөд шүүхийн эл харалган шийдвэрийн улмаас Хан-Уул дүүргийн мянга мянган сонгогч сонгох эрхээ эдэлж чадахгүй байхад хүрээд буйг анхаарууллаа.