Өмнөх сонгуулиар морьтой "пи ар"-даж бие даан сонгогдсон гишүүн бол С.Жавхлан. Түүний шинэлэг дүр төрх болон олон түмэнд хүндлэгдсэн дуучны байр суурь нь  гишүүний сэнтийд залрахад түшсэн хэрэг. Энэ удаад тэрбээр АН-аас нэр дэвшинэ. “Тавилан” хэмээх үгээр трэнд хийж, төрөлх нутаг Увс аймгаас нэр дэвшихээр болсон юм. Ингээд С.Жавхлан гишүүний хөрөнгө орлогын мэдүүлгээс танилцуулъя. 

Тэрбээр 2018 оны хөрөнгө орлогын мэдүүлэгтээ жилийн орлогоо 22.7 сая төгрөг гэж мэдүүлжээ. Энэ нь анх гишүүнээр сонгогдохдоо мэдүүлж байсан орлогоос хэд дахин буурсан дүн юм. Тухайлбал, 2015 онд жилийн орлого нь 250 орчим сая төгрөг байжээ. Харин 2019 онд бага зэрэг өсөж жилийн орлого нь 30 сая төгрөг болжээ.

2018 оны хөрөнгө орлогын мэдүүлэгтээ 132 сая төгрөгийн үнэ бүхий барилга байгууламжтай гэж тусгасан бол 2019 онд 816 сая төгрөг болж өсжээ. Мөн өмнөх онд 433 сая төгрөгийн тээврийн хэрэгсэл, 102 сая төгрөгийн мал, аж ахуйтай байсан бол энэ онд гаргасан мэдүүлэгт 245 сая төгрөгийн тээврийн хэрэгсэл, 127 сая төгрөгийн мал аж ахуйтай гэжээ.

С.Жавхлан гишүүн 55 сая төгрөгийн үнэ бүхий үнэт эдлэл, 66 сая төгрөгийн хадгаламжтай. Хадгаламжийн мөнгө нь өмнөх оноос гурван сая төгрөгөөр буурсан байна. Тэгвэл 2018 оны мэдүүлэгтээ 359 сая төгрөгийн зээлтэй гэсэн бол жилийн хугацаанд зээлийн хэмжээ нь 854 сая төгрөг болж өсжээ. 

А.Сүх