Энэ сарын 3-нд ХӨСҮТ-ийн хоёр, Дархан-Уул, Зоонозын өвчин судлалын үндэсний төвийн салбар лабораторид нийт 469 хүний шинжилгээ хийжээ. Үүнээс нэг тохиолдол илэрсэн байна. 

ХӨСҮТ-ийн Ерөнхий захирал Д.Нямхүү "Тавдугаар сарын 25-нд Москвагаас ирсэн нэг хүний давтан шинжилгээнээс халдвар илэрлээ. Шинжилгээг задалж хэлбэл, тандалтын зорилгоор 13, Орхон, Сэлэнгэ, Дархан-Уул аймагт тусгаарлагдсан 235 хүн болон Алтанбулгийн боомтоор орж ирсэн 45 жолоочид шинжилгээ хийсэн. Бүгд сөрөг гарсан.

Өнөөдөр нэг сайн мэдээтэй. ХӨСҮТ-ийн эмчилгээний хэсгээс 21 хүн эдгэрч дараагийн шатанд шилжлээ. Эдгээр нь тавдугаар сарын 13, 14-нд ОХУ-аас ирсэн хүмүүс байна. Үүнээс ес нь оюутан. Бусад нь ажил үүрэг гүйцэтгэж яваад ирсэн хүмүүс байна.

Өнөөдрийн байдлаар ХӨСҮТ-д нийт 157 хүн байна. Эдгэрээд гарсан хүмүүсээс ажиглалтаас бүрэн гарсан 13 хүн байна" гэлээ. 

А.Сүх