Эрүүл мэндийн яамнаас коронавирусний нөхцөл байдалтай холбогдуулан ээлжит мэдээллээ хийлээ.
Өнөөдрийн байдлаар коронавирусний халдвараар 216 орны 6.5 сая хүн өвчлөөд байна. ЭМЯ-ны хэлтсийн дарга Д.Нарангэрэл "Тав хоногийн хугацаанд өвчлөл хагас саяар нэмэгдэж байна. Өвчний тархалт өндөр байгааг харуулж байна.
Одоогийн байдлаар дэлхий нийтээр гурван сая хүн эдгэрч, гурван сая хүн эмчлүүлж байна. Манай хойд хөрш ОХУ-д нэг өдрийн дотор 8536 хүн өвчилсөн. Хил залгаа нутгуудад 24-120 тохиолдлоор нэмэгджээ.
Манай улсын хувьд өнөөдрийн байдлаар 1780 хүн ажиглалтад байна. Нэг хүн өчигдөр ажиглалтад шинээр орсон. Хөл хориог багахан сулруулахад халдварын тохиолдол нэмэгдэж байгаа дүр зураг ажиглагдаж байна. Тиймээс хөл хорионы арга хэмжээгээ сулруулаад байсан зарим улс орнууд буцаад чангаруулж эхэллээ" гэв.
ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа “Сүүлийн 24 цагийн хугацаанд АНУ-д шинээр 25 мянган тохиолдол илэрч, 1045 нас баралт бүртгэгдлээ. Бразил улсад 28.6 мянган халдвар илэрч нийт халдварын тохиолдол 584 мянга боллоо. Мөн өдөр 1349 нас баралт бүртгэгдсэн” гэлээ.
А.Сүх
