Хөдөлмөрийн үндэсний нам, Монголын Социал Демакрат нам, Зүй ёс намууд нэгдэж УИХ-ын 2020 оны ээлжит сонгуульд “Зөв хүн электорат” эвсэл болон оролцож байна. Ингээд эвслийн дарга болон зарим гишүүдийн хөрөнгө орлогоос танилцуулъя.

“Зөв хүн электорат” эвслийн дарга Б.Найдалаа нь СЭЗДС-д багш, Монголын Банкны холбооны гүйцэтгэх захирал, MCS групп, Юнител ХХК-ийн Бизнес хөгжлийн захирлаар ажиллаж байсан. Сүүлийн үед улстөрд идэвхтэй оролцох болсон юм. Тэрбээр жилийн 55 сая төгрөгийн орлоготой. 620 сая төгрөгийн нийтийн хоёр орон сууц, 80 сая төгрөгийн Lexus 570 автомашинтай. Мөн 180 сая төгрөгөөр үнэлэгдэх үнэт эдлэл, 30 сая төгрөгийн хадгаламж, 361 сая төгрөгийн зээл, 41 сая төгрөгийн авлагатай. "ЭсДиБи" ХХК-ийг эзэмшдэг гэж мэдүүлжээ.  

Тус эвслийн хамгийн идэвхтэй гишүүний тоонд Б.Мөнхцэлмэг ордог. Тэрбээр “Бид уучлахгүй” хөдөлгөөнийг манлайлан оролцож, олон танигдсан гэж болно. Түүний хувьд жилийн 45 сая орлоготой. Гэр бүлийн гишүүдийн нийт орлого 16 сая төгрөг, нийтийн хоёр орон сууцтай. Энэ нь 216 сая төгрөгөөр үнэлэгдэнэ гэжээ. 13.5 сая төгрөгийн Toyota Prius автомашинтай. 23 сая төгрөгийн хадгаламж, 65 сая төгрөгийн зээлтэй.

Мөн намын идэвхтэн гишүүний нэгд Т.Доржханд тооцогддог. Сангийн яамны мэргэжилтнээс ажлын гараагаа эхэлж байсан тэрбээр Олон улсын валютын сангийн Ази, Номхон далайн орнуудыг хариуцсан гүйцэтгэх захирлын зөвлөх хүртэл дэвшин ажиллаж байжээ.

Түүний жилийн орлого 20 сая, гэр бүлийн гишүүдийн нийт орлого 156 сая төгрөг. Нэг тэрбум төгрөгөөр үнэлэгдэх зуслангийн байшин, нийтийн орон сууцтай. 25 сая төгрөгийн үнэтэй Nissan, Largo автомашин, 10 сая төгрөгийн 12 адуутай. Эрдэнэс ТТ ХК, Монре Даатгал ХХК, Монреимпекс ХХК, Зээл Эм Эн ХХК-иас хувьцаа эзэмшдэг.

Намын эмэгтэй лидерүүдийн нэг Б.Мөнхсоёл нь эдийн засагч мэргэжилтэй. Үндэсний стратегийн хүрээлэнгийн захирлаар ажилладаг.

Б.Мөнхсоёл жилийн 12 сая төгрөгийн орлоготой. Гэр бүлийн гишүүдийн нийт орлого 2.2 тэрбум төгрөг. Мөн 1.2 тэрбум төгрөгийн үнэ бүхий нэг орон сууц, 367.9 сая төгрөгийн автомашин, 367 сая төгрөгийн үнэт эдлэл, 3.2 тэрбум төгрөгийн хадгаламж, 2.4 тэрбум төгрөгийн авлагатай гэж мэдүүлжээ. Эн Си Си Эс ХХК, Токикен ХХК, Токикен Интернэйшнл ХХК, Т-Ар-Кю ХК-иудын хувьцаа эзэмшдэг.

А.Сүх