Архангай аймгийн Засаг дарга Ц.Мөнхнасан Хайрхан сумын ерөнхий боловсролын сургуулийн захирал Г.Баярбатыг үүрэгт ажлаас нь удаа дараа халсан асуудлаар тус сургуулийн багш нар манай сайтад хандсан юм. Шүүхээс Засаг дарга Ц.Мөнхнасаны үндэслэл тогтоогдохгүй байна гэсэн шийдвэр гаргаж, Г.Баярбатыг ажилд нь буцаан томилох шийдвэр хоёр удаа гаргасан байна. Энэ дагуу Ц.Мөнхнасан дарга Г.Баярбатыг үүрэгт ажилд нь томилсон ч өнгөрсөн тавдугаар сард гурав дахь удаагаа халжээ. Түүнийг ажлаас нь халах бүртээ намын гишүүнчлэлтэй, эсвэл ямар нэг хамаарал бүхий хүмүүсийг үүрэг гүйцэтгэгчээр томилдог байна. Энэ нь хууль тогтоомж зөрчсөн үйлдэл гэдгийг АТГ-аас хүртэл шалгаж тогтоосон аж. Ингээд түүнийг ямар шалтгаанаар ажлаас нь удаа дараа халсан, Ц.Мөнхнасан Засаг даргатай хувийн тааламжгүй харилцаатай эсэх талаар ярилцлаа. 

-Архангай аймгийн Засаг дарга Ц.Мөнхнасан Хайрхан сумын ЕБС-ийн захирлыг хуулийн үндэслэлгүйгээр ажлаас нь удаа дараа халлаа гэж танай сургуулийн хамт олон манай сайтад хандсан. Таныг яг хэдэн удаа ажлаас тань халсан юм бэ?

-Хамгийн анх 2017 оны долдугаар сарын 25-нд үүрэгт ажлаас нь халах тухай захирамж гаргасан. Шалтгаан нь аймгийн Засаг даргатай 2017 онд хамтран ажиллахаар байгуулсан үр дүнгийн гэрээгээр хүлээсэн үүргээ хангалтгүй биелүүлсэн зэрэг асуудал.

Гэсэн атлаа тэр хүн “Хайрхан, Булган, Цэнхэр сумын сургуулиудтай тодорхойгүй шалтгаанаар үр дүнгийн гэрээ байгуулаагүй. Үр дүнгийн гэрээ байгуулъя гэхээр завгүй байна гэдэг байсан. Гэтэл 2017 оны дөрөвдүгээр сарын 28-нд гэрээ байгуулж, үүнээс нэг сарын дараа буюу зургадугаар сарын 5-нд үр дүнгийн тайлан авсан. Ингээд үр дүнгийн тайлан хангалтгүй гэж ажлаас халсан.

Би ажлаа авсныхаа дараа өөрийнхөө хүсэлтээр сургуулийнхаа санхүүд аудитын шалгалт хийлгэсэн юм. Гэтэл өмнөх захирлуудын 24 сая төгрөгийн акт гарч ирсэн. Үүнийг надад тохсон. Би шүүхэд хандсан. Шүүхээс миний талд шийдвэр гаргасан. Ингээд ажилдаа 2018 оны арванхоёрдугаар сарын 21-нд орсон.

Гэтэл 2019 оны хоёрдугаар сард дахиад халсан. Халсан шалтгаан нь гурван хоног ажил тасалсан гэсэн бусдын аман үгээр, багш мэргэжилгүй гэсэн үндэслэл.

Би шүүхэд дахиад хандсан. Учир нь би сумын Засаг даргаасаа албан ёсоор чөлөө авсан. Би багшийн үнэмлэхтэй, боловсрол судлалын магистр хүн. Тиймээс шүүхээс дахиад миний талд шийдвэр гаргаж, ажилдаа 2020 оны гуравдугаар сард орсон. Гэтэл ажлаа аваад сар гаруйхан болтол өмнөх үндэслэлээрээ өнгөрсөн тавдугаар сард дахиад халсан.

-Яг аль үндэслэлээр нь?

-Ажил албан тушаалдаа тэнцэхгүй нь тогтоогдсон, халахуйц ноцтой зөрчил гаргасан гэдэг үндэслэл. Өмнө нь 2019 онд хоёр дахь удаагаа ажлаас халахдаа яг ийм шалтгаанаар халж байсан.

-Өчигдөр шүүх хурал болсон  юм байна. Ямар шийдвэр гарсан бэ?

-Хамгийн сүүлд буюу өнгөрсөн тавдугаар сард ажлаас халах үед өмнөх шүүхийн шийдвэрийн биелэлт хангагдаагүй байсан юм. Тиймээс өмнөх шүүхийн шийдвэр биелэгдээгүй байхад ажлаас халсан, ажлаас халахдаа өмнөх үндэслэлээрээ халсан учир Засаг даргын шийдвэрийг түдгэлзүүлж өгнө үү гэж шүүхэд хүсэлт тавьсан. Шүүх миний хүсэлтийг хүлээж авч шийдвэрлэсэн.

Өмнө нь хоёр удаа ажлаас халах үед нь Засаг даргын захирамжийг түдгэлзүүлэхгүйгээр ажлаа өгсний дараа шүүхэлдэлцсэн юм. Гэтэл энэ үеийн нийгмийн даатгалын төлөлт завсардсан. Тиймээс энэ асуудал эцэслэгдэн шийдвэрлэгдтэл Засаг даргын захирамжийг түдгэлзүүлэх хүсэлт гаргасан. Одоо ажлаа хийнэ, хажуугаар нь шүүхдэнэ гэсэн үг.

-Засаг дарга Ц.Мөнхнасан таныг яагаад удаа дараа халдаг юм бэ. Та үнэхээр шаардлагад нь нийцдэггүй юм уу. Эсвэл та хоёрын дунд хувийн тааламжгүй харилцаа байдаг юм уу?

-Шүүхийн шийдвэрээр бол Ц.Мөнхнасан үндэслэлгүй болох нь тогтоогдсон. Хувийн талаасаа ямар нэг тааламжгүй харилцаа байхгүй. Эхний хоёр удаа халах үедээ миний үүрэг гүйцэтгэгчээр Хайрхан сумын МАН-ын даргын гэргий Э.Ундармааг тавьсан. Энэ шийдвэр нь хууль зөрчсөн байна гэж АТГ-аас тогтоосон. Гурав дахь удаагаа намайг халах үедээ МАН-аас ИТХ-д сонгогдсон манай сургуулийн багшийг үүрэг гүйцэтгэгчээр тавьсан.

Цэнгэлбаяр гэж хүнийг үүрэг гүйцэтгэгчээр тавихдаа дөрөвдүгээр сарын 14-ний өдрийн АТГ-ын бичгийг үндэслэсэн гэсэн байна лээ.

Гэтэл би ажлаа гуравдугаар сарын 20-нд авсан. Ингэхээр намайг ажлаа аваад долоо ч хоноогүй байхад шахуу АТГ руу Цэнгэлбаярын материалыг тавьсан болж таарах гээд байгаа юм.

АТГ руу бичиг явуулахад хамгийн хурдандаа ажлын тав хоног, түүнээс хойш 10-14 хонож байж ирдэг. Цаг хугацаагаар тооцож үзвэл, намайг ажилд авахгүй, авсан ч халаад шинэ хүн тавина гэсэн бодолтой байсан юм болов уу.

-Та Ц.Мөнхнасантай уулзаж энэ талаар тодруулсан уу. Яг юу гэж хэлдэг юм бэ?

-Намайг уулзая гэхээр завгүй гэдэг. Албан тоот бичиг явуулахаар хариу өгдөггүй. Боловсролын даргатай уулздаг гэсэн. Энэ талаараа хэлэхэд дээшээ уламжилъя гэдэг.

-Та сургуулийн захирлаар 2016 онд томилогдсон байх аа?

-2016 оны нэгдүгээр сарын 1-нд томилогдсон.

-Та өмнөх Засаг даргын үед томилогдож. Энэ утгаараа хавчдаг юм болов уу?

-Яг наадах чинь. Гэхдээ би хэн нэгнийг ажлаас нь гаргаж байж энэ албыг аваагүй. Өмнөх захирал тэтгэвэртээ суусан.

-Энд намчирхах үзэл байна уу гэж харагдлаа. Та АН-ын талын хүн юм уу?

-Миний аав АН-ын гишүүн, аймгийн дэд дарга байсан хүн. Гэхдээ бүр 1997 оны үед шүү дээ. Үүнээс болсон юм болов уу.

-Тэгэхээр та аль нэг намын гишүүн биш гэдгээ баталж чадах уу?

-Чадна. Би аль нэг намын гишүүн биш. Намайг намын гишүүн гэж харддаг юм шиг байна лээ. Харин Засаг дарга Ц.Мөнхнасан бол намын хүн, би бол эгэл жирийн багш. Ажлаа тайван хиймээр байна.

-Хэн нэгэн улстөрчийн сонгуулийн сурталчилгаанд оролцож байсан уу?

-Ёстой үгүй.

-Таныг гурван удаа үндэслэлгүйгээр халснаас болж нийгмийн даатгал тасалдсан, цалин хөлсөө авч чадахгүйд хүрсэн гэж ойлгож болох уу?

-Эхний удаагийн халалтын нөхөн олговороо авсан. Хоёр дахь удаагийн халсан нөхөн олговорыг одоо болтол авч чадаагүй. Нийгмийн даатгалын хувьд 2018, 2019 он хоёулаа хоосон.

Г.Нацаг