АН-ын дэд дарга З.Нарантуяа Завхан аймагт дахин нэр дэвшихээр болсон. Монгол шуудан банк, Хадгаламж банкны дэд захирлаар ажиллаж байсан тэрбээр З.Энхболдын эдийн засгийн бодлогын зөвлөхөөр ажиллах болсноор Санхүүгийн зохицуулах хорооны даргаар томилогдож байв. Ийнхүү улс төрийн замналээ эхлүүлснээр парламентад сонгогдож, өдгөө АН-ын голлох хүний нэг болсон юм. 

Тэрбээр өнгөрсөн 2018 оны жилийн орлого нь 64 сая төгрөг, гэр бүлийн орлого 37 сая төгрөг байсан юм.

Харин 781.6 сая төгрөгийн орон сууц, 84 сая төгрөгийн Lexus,570, ямаа-10, хонь-10, үхэр-2, адуу-5 байсан бол 75 сая төгрөгийн үнэт эдлэл, 20 сая төгрөгийн хадгаламж,  80 сая төгрөгийн авлага, 100 сая төгрөгийн зээлтэй, "Говь" ХК, "Атар өргөө" ХК, "Эм би Ди", "Парита энд партнерс" компаниас хувь хүртдэг байв.

Тэгвэл үүнээс нэг жилийн дараа орлого нь 101.6 сая төгрөг болж өссөн бол гэр бүлийн орлого нь мөн л 48 сая болж өсчээ.

Орон сууц, мал аж ахуй, автомашины үнэт эдлэл, зээл, авлагын хэмжээ хэвээр бол хадгаламж, картын үлдэгдэл нь 5.5 сая болж буурчээ.

Эндээс үзвэл, З.Нарантуяа гишүүний хөрөнгө орлого хэтэрхий цэвэрхэн гэж харагдахаар байна. Учир нь УИХ-ын гишүүдийн жилийн орлого жил бүр огцом өсөх, эсвэл хэт буурах байдал жил бүр ажиглагддаг. Харин түүнийх бараг өөрчлөлтгүй байгаа нь хөрөнгөө нуун дарагдуулсан уу гэсэн хардлага төрөхөөр. Учир нь хэрвээ ямар нэг байдлаар хөрөнгөө өсгөж, эсвэл нуун дартагдуулсан бол түүнийг олж илрүүлэх боломж тун бага гэдгийг АТГ-аас мэдэгдсэн удаатай. Энэ ч утгаараа Завханд дахин горилж буй тэрбээр нэр цэвэр байх үүднээс ийм тактик хэрэглэсэн байхыг үгүйсгэхгүй. Үгүй ч байж мэднэ. 

Г.Маргад