Тээврийн цагдаагийн албаны Жижүүрийн шуурхай удирдлагын хэлтэс энэ сарын 1-нээс 5-ны өдрүүдэд нийт 918 дуудлага мэдээлэл хүлээн авснаас 644 зам тээврийн ослын шинжтэй дуудлага мэдээлэл бүртгэгдсэн байна.
Бүртгэгдсэн зам тээврийн ослын улмаас 24 хүн гэмтсэн. Үүний тав нь хүүхэд, Ноцтой зам тээврийн ослын улмаас орон нутагт тав хүний амь нас хохирсон байна.
Нийт хүн бэртсэн, амь нас хохирсон ослыг хэлбэрээр нь авч үзвэл
- Явган зорчигч мөргөх хэлбэрээр -16
- Мөргөлдөх хэлбэрээр-1
- Онхолдох хэлбэрээр-1
- Үл хөдлөх цэг мөргөх хэлбэрээр-1
- Мотоцикл, унадаг дугуйтай мөргөлдөх хэлбэрээр-5 тус тус бүртгэгдсэн байна.
Ноцтой зам тээврийн ослоос дурдвал:
2020.06.01-ний өглөөний 05.48 цагийн орчимд Хөвсгөл аймгийн Тосонцэнгэл сумын нутаг дэвсгэрт асфальтан замд Honda Insight маркийн автомашин онхолдож, жолооч 31 настай, эрэгтэй Д, зорчигч 30 настай, эрэгтэй О, 29 настай, эрэгтэй Н нарын 3 хүний амь нас хохирсон,
2020.06.04-ны өдрийн 10.35 цагийн орчимд Архангай аймгийн Хашаат сум Жаргалант багийн нутаг дэвсгэр асфальтан замд улсын дугааргүй Dayun маркийн Г жолоочтой мотоцикл онхолдож, жолооч 47 настай, эрэгтэй Г-гийн амь нас хохирсон,
2020.06.04-ны шөнийн 22.20 цагийн орчимд Хөвсгөл аймгийн Мөрөн сум /аймгийн төвд/ шороон замд Mutsubishi L200 маркийн А жолоочтой автомашин Бүргэд маркийн Г жолоочтой мотоциклтой мөргөлдөж, мотоциклийн жолооч 27 настай, эрэгтэй Г-гийн амь нас хохирсон хэргүүдийг тус тус шалгаж байна.
Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 108 жолоочийг илрүүлж, эрхгүй үедээ согтуугаар тээврийн хэрэгсэл жолоодсон 20 хүнийг шүүхээр баривчилж хуулийн дагуу хариуцлага тооцсон байна.
Согтуугаар тээврийн хэрэгсэл жолоодож зам тээврийн осол гаргасан 4 зөрчил бүртгэгдсэн.
Энэ 7 хоногт бүртгэгдсэн зам тээврийн осол, хэргийг өмнөх 7 хоногийн нөхцөл байдалтай харьцуулахад нийт дуудлага мэдээлэл 5,0 хувиар, бүртгэгдсэн зам тээврийн осол 7,4 хувиар, зам тээврийн ослын улмаас хүний амь нас хохирсон осол 44,5 хувиар тус тус буурч, ослын улмаас гэмтсэн хүн 12,5 хувиар өссөн үзүүлэлттэй байна.
Иймд замын хөдөлгөөнд оролцогч та бүхэн тээврийн хэрэгслийн хурдыг тохируулан хөдөлгөөнд оролцох, урин дулааны улирал ирж унадаг дугуйтай, мотоциклтой замын хөдөлгөөнд оролцох хөдөлгөөн нэмэгдсэн тул анхаарал болгоомжтой зорчих, бага насны хүүхдийг заавал насанд хүрсэн харгалзах хүнтэй замын хөдөлгөөнд оролцуулахыг Тээврийн цагдаагийн албанаас анхааруулж байна.
