УОК-ын Шуурхай штабаас цаг үеийн асуудлаар мэдээлэл хийлээ.

Энэ үеэр ОБЕГ-ын дэд дарга, хурандаа Б.Ууганбаяр “Өнөөдөр нэмж 216 хүн гэрийн ажиглалтад шилжинэ. Алтан боломж гарлаа. Оюутолгой компани Австрали руу ажилчдаа хүргэхээр МИАТ компанийн онгоцыг түрээслэхээр болсон. Энэ боломжийг ашиглаж, Австралид оршин суугаа иргэдээ энэ онгоцоор авчирна. Илүү дэлгэрэнгүй мэдээллийг Л.Мөнхтүшиг өгнө. Гэрээр ажиглалтад байгаа хүмүүст гэнэтийн шалгалт хийсэн. Нийт 94 хүнийг шалгахад 11 хүн гэртээ байгаагүй. Хоёр хүний хаяг тодорхойгүй байсан учраас хариуцлага тооцно.

Халдвараас урьдчилан сэргийлэх нэг удаагийн хуульд иргэний хүлээх үүргийг тодорхой зааж өгсөн. Үүнд, дэглэм, журам, үүрэг даалгаврыг ягштал биелүүлэх ёстой. Шаардлагатай мэдээллийг үнэн зөв өгнө. Мэргэжлийн байгууллагын шаардлагын дагуу үзлэгт заавал хамрагдана, шинж тэмдэг илэрвэл заавал мэдэгдэх, халдвараас урьдчилан сэргийлэх, тусгаарлах, ажиглах журмыг мөрдөх ёстой, худал ташаа мэдээлэл түгээхийг хориглоно зэрэг асуудлыг тусгаж өгсөн. Гэтэл зөвхөн тусгаарлалт, ажиглалтад байгаа иргэд гэлтгүй бусад иргэд ч гэсэн журам дагаж мөрдөхдөө хойрго хандаж байна. Сонгууль удахгүй болох гэж байна.

Сонгуулийн явцад халдвараас урьдчилан сэргийлэх журмыг сайтар дагаж мөрдөх ёстой. УОК-т маш олон өргөдөл ирж байна. Тухайлбал, нэг өргөдөл 16 удаа давтагдаж ирсэн. Өргөдөл замдаа хаягдах, гээгдэх асуудал байхгүй учир давтан явуулах хэрэггүй. Нийт 75 боть өргөдөл ирсэн. Гэтэл үүнээс гадна давтан өргөдөл 23 боть байна” гэлээ.