УИХ-ын ээлжит сонгуулийн санал хураалт улс орон даяар явагдаж байна. Үүнээс өмнө өөрийн биеэр очих боломжгүй иргэд буюу хөгжлийн бэрхшээлтэй болон ахмад настай иргэдийн саналыг зөөврийн хайрцгаар авсан юм. Харин хүндэтгэх шалтгааны улмаас зөөврийн хайрцгаар саналаа өгч чадаагүй 70 орчим настай ахмад настан хүүгээрээ үүрүүлэн Үндсэн хуулиар олгосон сонгох эрхээ хэрэгжүүлэхээр хэсгийн хороонд ирсэн талаарх зураг олон нийтийн сүлжээнд хөвөрлөө. 

Зургийг нийтэлсэн иргэн "Явуулын хайрцгаар санал өгөх хүсэлтээ гаргаагүй байж байгаад хоцорчихож гээд 70 настай өвөө хүүгээрээ үүрүүлэн ирээд саналаа өглөө.

Ахмадууд л ийм хариуцлагатай, сэтгэлтэй байна. Өвөөг хараад саналаа өгөх үү яах вэ гээд сууж байгаа залуу та нэгийг бодох биз ээ" хэмээн тайлбарлажээ. Үнэхээр ч тийм.

Дөрвөн жилд нэг удаа олддог сонгох, сонгогдох эрхээ эдлэх нь Монгол Улсын иргэн бүрд Үндсэн хуулиар олгосон язгуур эрх. Уг эрхээ эдэлж, сонгуульдаа идэвхтэй оролцож, ирэх дөрвөн жилд өөрсдийг нь төлөөлөх хүнийг сонгож, саналаа өгөх нь иргэний үүрэг. Сонгуулийн цикл бүрээр санал өгөх сонгогчдын дийлэнх хувийг бүрдүүлдэг залуу үеийн төлөөллийн ирц хангалтгүй явж ирсэн ч энэ удаад харьцангуй сайн үзүүлэлттэй байгааг холбогдох байгууллагаас өгсөн мэдээллээс харж болно.

Хамгийн гол нь, дөрвөн жилд нэг удаа болдог сонгуулиар иргэний эрхээ эдэлж, үүргээ биелүүлэх нь сонгогч бидний нэн түрүүнд хийх ёстой алхам юм.  

С.Сүлд