УИХ-ын 2020 оны ээлжит сонгуулийн санал хураалт 22.00 цагт дууслаа. УИХ-ын сонгуулийн 29 тойрогт ирц хүрчээ. 

Санал хураалтын талаар СЕХ-ны дарга Ч.Содномцэрэн “Нийт 2070 хэсгээс ирсэн дүнг нэгтгэж, дүн гарна. Өнөөдрийн байдлаар бороо хур элбэг байсан талаарх мэдээлэл ирж байна. Үүнтэй холбогдуулан дүн мэдээ удааширч болзошгүй. Тухайлбал, Хэнтий аймгийн Мөрөн сумын санал авах байр үерт автсан асуудал гарсан. Зарим сонгуулийн санал авах байранд аянга бууснаас санал тоолох төхөөрөмж эвдрэх зэрэг явдал гарсан. Эдгээрт яаралтай арга хэмжээ авч хэвийн үйл ажиллагаанд нь оруулсан.

СЕХ энэ удаа серверт ирж байгаа дүнг шууд дамжуулан хүргэж байгаа. Дүнг аваад боловсруулж, нэгтгэх ажиллагаа хийгдэхгүйгээрээ онцлог. Хоёрдугаар сарын 1-нд УИХ-ын сонгуулийг товлон зарласан. Үүнээс хойш таван сар ажиллаж байж санал авах ажиллагааг зохион байгууллаа.

Сонгууль зохион байгуулахад амаргүй, хүнд нөхцөлд явууллаа. Коронавирусний өвчлөлөөс сэргийлэх, дотооддоо алдахгүй байхад арга хэмжээ авч ажилласан. УОК-оос сонгууль явуулах нөхцөлд хэд хэдэн зөвлөмж, Засгийн газраас шаардлагатай төсөв мөнгийг шийдэж өгсөн. ЭМЯ, УОК, ОБЕГ-ын хамтарсан ажиллагааны үр дүнд явуулсан.

Сонгогчид өмнөхөөсөө илүү идэвхтэй оролцлоо. Бороотой байсан ч шүхрээ бариад, дугаарлаад, маскаа зүүгээд соёлтой оролцсон. Ирц 29 тойрогт хүрсэн гэсэн мэдээлэл авсан" гэлээ.

А.Сүх