Хан-Уул дүүргийн VIII хороо, Сонсголонгийн гүүрээс баруун зүгт Туул голд хүүхэд живсэн тухай дуудлага энэ 29-ний өдрийн 20.10 цагт Онцгой байдлын газарт иржээ.

Тодруулбал, Туул голд гурван настай хүүхэд живсэн бөгөөд ар гэрийнхэн нь болон аврагчид хүүгийн цогцсыг эрэн хайж байна. Ослын дуудлагын дагуу Нийслэлийн Аврах ангийн завьт эргүүлийн алба хаагчид, тус дүүргийн Цагдаагийн II хэлтсийн алба хаагчид, ар гэрийнхэн Хан-Уул дүүргийн 16 дугаар хорооны харьяат гурван настай А-ийн цогцсыг эрэн хайх ажиллагаа зохион байгуулж байна.

Үүнээс гадна өнгөрсөн амралтын өдөр буюу Туул голд 19, 20 настай хоёр иргэн живсэн бөгөөд Дархан-Уул аймгийн харьяат иргэн 19 настай, эрэгтэй Э-ийн цогцсыг голын эргээс олсон бол 20 настай, эрэгтэй С-г одоог хүртэл олоогүй байна.