Ерөнхийлөгчийн зарлигийн дагуу Анхдугаар чуулганыг хуралдуулж, шинээр болон улиран сонгогдсон УИХ-ын 75 гишүүн тангарагаа өргөлөө. Ингэснээр 2020-2024 оны парламентын бүрэн эрх албан ёсоор хэрэгжиж эхэллээ. Удахгүй УИХ-ын сонгуульд 62 суудлыг авч, ялалт байгуулсан МАН-аас Ерөнхий сайд болон УИХ-ын даргад нэр дэвшигчийг оруулж ирж, томилуулах учиртай. Одоогоос дөрвөн жилийн өмнө буюу 2016 оны сонгуульд эрх баригч МАН үнэмлэхүй ялалт байгуулж, УИХ-д 65 суудлыг авч байв. Энэ удаад ч 62 суудалтай болсон тэд УИХ-ын гишүүний тангараг өргөснөөр албан ёсоор улиран засаглахаар болж байна. Тэгвэл 2016, 2020 онд дараалан ялалт байгуулсан МАН-д, УИХ-д шинээр сонгогдсон гишүүдэд хандан өмнөх Ерөнхийлөгч Ц.Элбэгдорж болон одоогийн Төрийн тэргүүн Х.Баттулга нар юу гэж хэлж, захиж байсныг харьцуулъя. 

Ц.Элбэгдорж: Монголын ард түмэн сонголтоо хийлээ. Энэ бол дээд шийдвэр. СЕХ УИХ-д сонгогдсон гэсэн гишүүдийн нэрсийг надад өргөн барьсан. Иргэд сонгогчдодоо өгсөн амлалт, тэдэнтэй хийсэн гэрээгээ шударгаар хэрэгжүүлж ажиллахыг сануулахын ялдамд дараахь таван зүйлийг давын өмнө тэмдэглэн хэлье.

1. УИХ-ын шинэ бүрэлдэхүүн хууль тогтоох ажлаа Төрийн албаны болон Хариуцлагын хуулийг хэлэлцэж батлахаас эхлээсэй гэж хүсэж байна.
2. УИХ-д дийлэнх олонхийн суудал авсан Монгол Ардын Нам Монгол Улсын Засгийн газрыг ард түмэндээ өгсөн амлалтынхаа дагуу мэргэжлийн, чадварлаг, ажил үүргийн давхардалгүй, хяналттай хариуцлагатай байхаар зохион байгуулах ёстойг хэлье.
3. Төрийн албаны бүх шатанд Төрийн албан хаагчдын мэргэшсэн, тогтвор суурьшилтай байдлыг хадгалж ажиллах зүй ёсны шаадлага гарч байгааг энд онцлон сануулъя.
4. Өмнөх Улсын Их Хурал, Засгийн газар, орон нутгийн удирдлагын олон нийтэд хүрсэн, үр дүн хэрэгжилт нь иргэдийн талархал хүлээж байгаа ажлуудыг тасалдал хийдэлгүй үргэлжлүүлэх нь манай төрт ёсны уламжлалд нийцнэ гэдгийг зориуд цохон сануулъя.
5. Монгол Улсын уламжлалт найрсаг нээлттэй бодлогын залгамж чанар тууштай үргэлжлэх нь гарцаагүй. Үүнийг бүрэн эрхээ хэрэгжүүлж эхлэх энэ цаг мөчөөс хэлбэрэлтгүй нотолж ажиллахыг Та бүхнээс хүсье.

Монголын түүхт төрийн дээд эрх мэдлийг хэрэгжүүлж ажиллах түшээ болно гэдэг бол их үүрэг хариуцлага, их нэр төр, эрхэм нийтлэг эрх ашиг юм. Үүнд Та бүхнийг тэнцэж ажиллана гэдэгт итгэлтэй байна.

/УИХ-ын долоо дахь удаагийн Анхдугаар чуулганы нээлтэд хэлсэн үгээс. 2016.7.5/

Х.Баттулга: УИХ-ын сонгуульд үнэмлэхүй ялалт байгуулж, 62 суудал авч олонхыг

бүрдүүлж байгаа Монгол Ардын намаас сонгогдсон гишүүд өнгөрсөн 4 жил, ирэх дөрвөн жил нийтдээ 8 жил засаглаж, асар их хариуцлага, үүрэг хүлээж байгааг зориуд Та бүхэнд сануулъя. Та бүхэнд одоо шалтаг тоочих, өмнөх эрх баригчид руугаа бүх бурууг чихэх, хариуцлагаас зайлсхийх эрх байхгүй боллоо. Бүх зүйл Та бүхний хариуцлага, үүрэг боллоо. Асуудлаас тойрох, шийдлээс бултах ямар ч арга байхгүй. Олонх болсондоо эрдэлгүй, хүчээр түрэлгүй цөөнхийнхөө саналыг хүндэтгэж, хамгийн гол нь дэлхий дахинд болон улс орны өмнө нүүрлэн ирсэн эдийн засгийн хямрал, хүндрэлийг даван туулах, ард иргэдийн амьжиргааг доройтуулалгүй, ажлын байрыг нь хадгалж үлдэх оновчтой шийдлүүд, шийдвэрийг гаргахыг Та бүхнээс сонгогчид хүсэж, итгэлээ хүлээлгэснийг битгий мартаарай.

Та бүхний өмнө улс орны эдийг засгийг өөд татах, иргэдийн амьжиргааг дордуулахгүйгээр хямралаас авч гарах түүхэн үүрэг тулгарч байна. Хүнд цаг үе бүхэнд ард түмэн өөрсдийн итгэл найдварыг хөсөрдүүлэхгүй хүмүүсийг сонгож дэвшүүлж, шийдвэр гаргах эрхийг олгодог. Та бүхэн иргэдийнхээ итгэлийг эвдэлгүй, иргэдийнхээ өмнүүр орж өөрсдөдөө боломж эрэлхийлэлгүй үнэнчээр ажиллана гэдэгт найдаж байна.

/УИХ-ын найм дахь удаагийн Анхдугаар чуулганы нээлтэд хэлсэн үгээс. 2020.6.30/

С.Сүлд