Ерөнхийлөгчийн товлон зарласан хугацааны дагуу өнөөдөр анхдугаар чуулган болж, УИХ-ын гишүүд тангаргаа өргөлөө.

Өмнөговь аймгаас УИХ-ын гишүүнээр сонгогдсон Н.Наранбаатар “Өмнөговь аймгийн хувьд асуудал нэлээд бий. Мөн Монгол Улсын төсвийн нэлээд хувийг бүрдүүлдэгээс гадна ирэх онуудад томоохон төсөл хөтөлбөрүүд хэрэгжиж эхэлнэ. Цар тахалтай холбоотойгоор оны эхнээс хойш үүссэн эдийн засгийн байдал нийгмийн асуудлыг яаралтай хэлэлцэж тодорхой шийдвэр гаргах ёстой.

Хамгийн гол нь экспортод гаргаж байгаа бараа бүтээгдэхүүний тоо хэмжээг өсгөх шаардлагатай. Тухайлбал, Өмнөговийн боомтоор нүүрсний экспортын ихэнх хувь, зэсийн экспортын тал хувь нь гарч байна.

Тиймээс экспортын өдөрт гарах хэмжээг нэмэгдүүлэх, хорио цээрийн зарим хязгаарлалтын дэглэмийг сулруулах арга хэмжээ авах хэрэгтэй. Гэхдээ зөвхөн уул уурхайн салбараас эдийн засаг хамаарч болохгүй. Үйлвэрүүдийг бий болгож, ажлын байрыг нэмэгдүүлэх арга хэмжээг авах нь зүйтэй.

Түүнчлэн говь нутгийн иргэдийн чухал асуудал нь ус байдаг. Тиймээс аж ахуйн паркуудыг гүний ус ашиглахыг хориглох, хязгаарлах шийдвэр гаргахыг дэмжинэ. 

Миний хувьд 20 гаруй жил төрийн албанд ажилласан. Бүхий л шатанд ажиллаж үзсэн учраас Төрийн байгуулалтын байнгын хороонд ажиллах хүсэлтэй. Энэ хүрээнд төсвийн хэт төвлөрлийг сааруулах, орон нутгийн эрх мэдлийг нэмэгдүүлэх, цэргийн алба хаагчийн нийгмийн асуудлыг шийдвэрлэнэ" гэлээ. 

А.Сүх