УИХ-ын гишүүн Д.Тогтохсүрэн "Үндсэн хууль, УИХ-ын тухай болон Дэгийн тухай хуулийн дагуу УИХ-ын даргад Г.Занданшатарын нэрийг дэвшүүлж байна. УИХ-ын гишүүн Г.Занданшатар нь УИХ-д дөрөв дэх удаагаа сонгогдон ажиллаж байгаа юм. Түүний хувьд 2019 онд М.Энхболдыг албан тушаалаас нь огцруулсны дараа нэрийг нь дэвшүүлэн томилж байсан юм. 

Тэрбээр УИХ-ын даргаар ажиллах хугацаандаа Үндсэн хуулийн нэмэлт, өөрчлөлтийг хэлэлцэж, батлуулахад голлох нөлөөтэй оролцсон хүний нэг. Улмаар Г.Занданшатарыг УИХ-ын даргаар улираан сонгох санал хураалтыг илээр явуулахад гишүүдийн 100 хувь нь дэмжсэнээр тэрбээр улиран сонгогдлоо. 

Түүнийг томилсны дараа УИХ-ын гишүүн Б.Пүрэвдорж "Монголын ард түмэн сонголтоо хийж, МАН-д итгэл үзүүлсэн нь тогтвортой байдлыг хүссэнтэй холбоотой. Дээрээ ард түмэнтэй, дэргэдээ сөрөг хүчинтэй гэдгээ анхаарч ажиллаарай. Улс орны хөгжил, тогтвортой байдлын талаар хамтарч ажиллана. Сэлмээ сугалсан шиг сугалаад, хуйнд нь буцааж хийлгүй яваарай" гэлээ.

Харин УИХ-ын даргаар улиран сонгогдсон Г.Занданшатар "Өндөр нэр хүндтэй албанд тохоон томилогдсон УИХ-ын гишүүдэд баяр хүргэе. Төрийн эрх барих дээд байгууллагын даргаар сонгосон У.Хүрэлсүх, МАН-д талархал илэрхийлье. Улс төрийн дөрвөн нам парламентад суудалтай боллоо. МАН-ын үнэмлэхүй ялалт нь эхэлсэн ажлаа дуусгах, улсаа хөгжүүлэх, сахилга, ёс зүйн чиглэлээр авч байгаа арга хэмжээгээ үргэлжлүүлэх өндөр хариуцлага үүрэг даалгавар юм. 

Энэ их итгэл хүчийг сайн сайхан маргаашийн төлөөх давалгаа гэж зүтгэх ёстой. Энэ бол бол амаргүй ажил. Гэхдээ иргэдийн итгэлийг хугалах эрх бидэнд байхгүй. Шинээр байгуулагдсан УИХ нэн яаралтай ажилдаа орж, хүчээ нэгтгэсэн ард түмний улсаа мандуулах ёстой. Хуулийн реформ хийх, Үндсэн хуулийг амилуулах шаардлага байна" гэв.

С.Сүлд