УИХ-ын чуулганы анхдугаар хуралдаан өчигдөр болж, гишүүдийн олонхийн саналаар УИХ-ын дарга, Ерөнхий сайд, бүлгийн дарга нарыг улираан томилохоор шийдвэрлэсэн. Энэ удаагийн УИХ-ын сонгуульд иргэдийн МАН-д дахин итгэл хүлээлгэж олонх болгож сонгосон билээ. Энэ хүрээнд мөрийн хөтөлбөрт тусгасан амлалтуудаа хэрхэн биелүүлэх талаар иргэдэд хүлээлт үүсгээд байна. Тэгвэл ирэх намрын чуулганаар нэн тэргүүнд шийдвэрлэх талаар УИХ-ын гишүүн М.Оюунчимэгээс тодрууллаа.

-Та УИХ-ын сонгуульд хоёр дахь удаагаа сонгогдон ажиллаж байна. УИХ-д эмэгтэй гишүүдийн үүрэг оролцоо, иргэдийн хүлээлт их байдаг. Энэ удаад хэрхэн ажиллах бол?

-УИХ-д эмэгтэй квот өмнөх парламентын балансаа барилаа. Өмнөх сонгуулиар 13 эмэгтэй сонгогдож байсан бол энэ удаагийн томсгосон мажоритар тогтолцоогоор мөн 13 эмэгтэй сонгогдлоо. Эрэгтэй, эмэгтэй гэхээс илүү УИХ-ын гишүүн гэдэг бол иргэдийг төлөөлж буй утгаар маш хариуцлагатай алба. Бидний хувьд ирэх жилүүдэд хийх ажил их байна. Ялангуяа улс орны эдийн засаг, гадаад өрийн асуудал байна. Мөн КОВИД-той холбоотойгоор дэлхийн эдийн засаг амаргүй түвшинд байна. Тиймээс эхний ээлжинд улсынхаа эдийн засгийг нөхөх, ажлын байрыг нэмэгдүүлж, хадгалах, эрүүл мэндийн салбарт тулгарч байгаа асуудал гээд маш том сорилтын өмнө байна. Энэ утгаараа хаа хаанаа хариуцлагатай байх нь туйлын чухал юм.

-МАН-ын мөрийн хөтөлбөрт Нийгмийн даатгалын шимтгэл төлдөг иргэдийг ипотекийн зээлд хамруулах, зээлийн хүүг бууруулах чухал асуудал тусгагдсан. Уг асуудлыг хэдий хугацаанд шийдвэрлэх боломжтой вэ?

-Биднээс мөрийн хөтөлбөр, амалсан томоохон ажлуудаа эхлүүлэхийг иргэд хүлээж байна. Тухайлбал, урьдчилгаа мөнгө төлөхгүйгээр Нийгмийн даатгалын шимтгэлээ үзүүлээд 4-6 хувийн ипотекийн зээлд хамруулна. Ингэхдээ анх удаа хамрагдаж байгаа иргэдийг ингэж хамруулна гэх зэргээр амалсан. Мөн зээлийн хүүг нэг оронтой тоонд хүргэнэ гэсэн. Энэ мэт дотоодын хийх ажлаа гадаад зах зээлтэй уялдуулж богино хугацаанд том арга хэмжээ авах ёстой. Энд манай 62-ын бүлэг онцгой үүрэг гүйцэтгэх ёстой. Үүнийг хийхийн төлөө цаг наргүй ажиллах ёстой.

-Төсвийн тодотгол хийх талаар яригдаж эхэллээ. Зарим гишүүдийн зүгээс төсвийн тодотгол яаралтай хийх шаардлагатай гэсэн байр суурь илэрхийлж байна. Та юу гэж үзэж байна вэ?

-Төвсийн тодотгол хийх магадлал маш өндөр байна. Учир нь томоохон хэмжээний хөрөнгө оруулалтуудыг тусгасан. Гэхдээ дэлхийн эдийн засгийн байдалд амаргүй байдал ажиглагдаж байна. Тухайлбал, ОУВС-аас гадаад эдийн засаг буурах хандлага байна гэж хэлсэн. Манай улсын экпортын гол бүтээгдэхүүн алтнаас бусад нь амаргүй байна. Тиймээс хэлэлцэж байгаад төсвийн тодотгол зайлшгүй хийх шаардлагатай гэсэн нэгдсэн байр суурьт хүрвэл хийнэ.

-Энэ удаагийн сонгуульд МАН-аас “Хүчээ нэгтгэе” гэсэн уриалга гаргасан. Магадгүй энэ уриалга ихээхэн нөлөөлсөн байх. Өмнө нь 65 суудал авах үедээ хагарсан шигээ дотроо хагаралдах вий гэсэн болгоомжлол бий?

-Өндөр хариуцлагын өмнө ирсэн. Учир нь иргэд бидэнд дахин итгэл хүлээлгэлээ. Ингэж дараалж сонгогдож байсан түүх маш ховор. МАН тэр дундаа У.Хүрэлсүхийн багт иргэд өндөр итгэл хүлээлгэж байгаа учраас өмнөх шиг асуудал давтагдахгүй байх гэж бодож байна. Өмнө нь шударга ёсны тэмцэл зайлшгүй хэрэгтэй байсан. Өнөөдөр шударга ёсны тэмцэл явж байж дэд бүтэц рүү, чухал зүйлд шаардлагатай хөрөнгө мөнгийг буруу замаар урсгадаг байсны крантыг хааж чадсан. Энэ нь иргэдийн зүгээс өндөр оноо тавих гол зүйл нь болсон байх. Тиймээс шударга ёсны тэмцлээ үргэлжлүүлж улс орон, иргэд рүүгээ чиглэсэн хөрөнгө оруулалтуудыг хийх талаар тууштай ажиллах ёстой.

Б.Лхам