Ерөнхийлөгч Х.Баттулга зарлиг гаргаж, Анхдугаар чуулганыг хуралдуулснаас УИХ-ын 75 гишүүн тангараг өргөснөөр 2020-2024 оны парламент албан ёсоор бүрэн эрхээ хэрэгжүүлж эхэллээ. Цар тахлаас үүдэлтэй хөл хорионы энэ цаг үед Анхдугаар чуулган зохион байгуулалт харьцангуй сайн болсон гэж дүгнэх зарим нь байгаа юм. Хуульд зааснаар Ерөнхийлөгч, УИХ-ын дарга, Ерөнхий сайдын болон төрийн арга хэмжээний ёслолын үйл ажиллагааг эрхлэн явуулах үндсэн үүргийг Төрийн ёслолын хэлтэс хариуцдаг. 

Засгийн газрын Хэрэг эрхлэх газрын харьяаны уг хэлстийг саяхныг хүртэл Х.Жанцан хариуцдаг байсан ч хүндэтгэх шалтгааны улмаас долоо хоногийн өмнө ажлаа хүлээлгэн өгсөн бололтой.

Түүний оронд Монгол Улсаас БНХАУ-ын Бээжин хотод суух Элчин сайдын яаманд зөвлөх бөгөөд Консулын хэлтсийн даргаар ажиллаж байсан Э.Одмөнхийг томилсон байна. Консул Э.Одмөнх нь УИХ-ын гишүүн, Батлан хамгаалахын сайд Н.Энхболдын хүү. Гадаад харилцааны яаманд олон жил ажилласан мэргэшсэн, туршлагатай дипломатч гэдгээрээ эчнээ танил.

Түүнийг өнгөрсөн оны наймдугаар сард Засгийн газрын хуралдаанаар Бээжин дэх Элчин сайдын яаманд Консулаар томилох шийдвэрийг гаргаж байсан удаатай. Гэвч Э.Одмөнх жил хүрэхгүй хугацааны дараа томилолтоо дуусган ийн ирж, Төрийн ёслолын хэлтсийн дарга болжээ.

Ирсэн даруйдаа тэрбээр Анхдугаар чуулганыг зохион байгуулах хүндтэй үүргийг хариуцаж, 75 гишүүн тангараг өргөх ажлыг зохион байгуулсан нь энэ байв.

Сонирхолтой нь, Э.Одмөнхийн гардан хариуцсан Анхдугаар чуулганы нээлтийн үеэр түүний аав Н.Энхболд УИХ-ыг даргалагч Х.Баделхан гишүүний араас тангараг өргөсөн нь содон тохиолдол байсан юм. Батлан хамгаалахын сайд Н.Энхболдыг одоогийн парламентаас хамгийн олон удаа сонгогдсон гэдгээр нь хоёдугаарт тангараг өргүүлсэн байж мэдэх. Түүний араас Дархан-Уул аймгаас сонгогдсон Б.Баттөмөр гишүүн тангараг өргөснөөр УИХ-ын гишүүд  цагаан толгойн нэрсийн дарааллаар буюу А-гаасаа эхэлсэн юм.

Г.Эрхэс