“Монгол Уулсад хөдөлмөр эрхлэлтийг дэмжих” төслийн хүрээнд “Хонины ноосны чанарыг сайжруулах” олон улсын сургалтыг Дундговь аймагт зохион байгууллаа.

Сургалтыг Ховд болон Дундговь аймгийн сургагч багш нар удирдаж Дундговь, Өмнөговь, Сэлэнгэ, Сүхбаатар, Төв, Хөвсгөл аймгаас ирсэн хоршооны 40 гишүүнийг хамруулсан байна. Үнэ цэнэ шингээсэн ноос бэлтгэх гол алхам бол малаа сайн тордож ноосыг нь чанаржуулах, малаа угааж ноосыг нь хяргаж авах арга барил, ноосоо ангилан ялгаж боловсруулах, мал эмнэлгийн үйлчилгээ үзүүлэх асуудлууд байдаг талаар сургагч багш нар хэлж байлаа.

Алтайн уулсын оргил дундын хоршооны дарга, сургагч багш Т.Алтансүх: Ноос боловсруулагчдын зүгээс малчдад тавьдаг гол шаардлага нь хяргасан ноосны урт нь жигд байх, өнгө, хээл, зооны хэсгээр нь ялгасан байх, сайтар угаасан байх асуудал юм. Үүнийг шийдвэрлэхийн тулд Австралийн сайн туршлагыг Пакистанд нэвтрүүлж, хонийг хяргахын өмнө угааж, ноос нь хатсаны дараа ноосыг нь гараар биш, машинаар хяргах аргыг нэвтрүүлжээ. Ингэснээр нэг хонин толгойгоос авах ноосны гарц 70 хувь байсан бол 90 хувьд хүрч өссөн төдийгүй чанарын хувьд сайжирсан байна.

ХХААХҮ-ийн сайд Ч.Улаан: Тус сургалтаар Ховд аймгийн хоршооны туршлагыг нэвтрүүлэн олон улсын туршлагаас хуваалцаж гараар хайчлан хяргах болон машинаар хяргахын ялгааг харьцуулсан судалгааг хийлээ. “НҮБ-ын Аж үйлдвэр хөгжлийн байгууллага (НҮБАҮХБ) нь Тогтвортой хөгжлийн зорилтуудыг хэрэгжүүлэх Монгол Улсын Засгийн газрын бодлого, зорилтуудыг дэмжиж Европын Холбооны санхүүжилтээр 2018 оны 3-р сараас эхлэн хэрэгжүүлж байна. Тус төсөл нь мал аж ахуйн салбарт, ялангуяа нэмүү өртөг шингэсэн арьс шир, ноос, ноолуур, мах, сүү үйлдвэрлэлийг хөгжүүлж хувийн хэвшлийн өрсөлдөх чадавхи, экспортыг нэмэгдүүлэн зохистой хөдөлмөр эрхлэлтийг дэмжихэд чиглэгдэж байгаа юм.